Manastir: Kafshët shtëpiake në rrugë rrezikojnë sigurinë në komunikacion

Prania e kuajve, dhive, lopëve dhe kafshëve të tjera në rrugët e Manastirit mbetet sfidë për qytetarët dhe autoritetet. Qytetarët dhe këshilltarët komunalë kanë shprehur shqetësim për lëvizjen e lirë të këtyre kafshëve, të cilat rrezikojnë sigurinë në komunikacion. «Disi ngadalë po na ecin punët, pa dashur të fajësoj askënd. Është e pakuptueshme, ndihem i pafuqishëm», tha kryetari i Komunës së Manastirit, Toni Konjanovski, gjatë një seance të Këshillit Komunal, duke shtuar se disa aksione të inspektorëve kanë dështuar për shkak të dekonspirimit të mundshëm të pronarëve.

Vendimi për Rend Komunal ndalon mbajtjen e bagëtive dhe kafshëve të tjera brenda zonës ndërtimore, si dhe kullotjen në sipërfaqe publike. Sipas rregullores, kafshët e gjetura pa pronar mund të dërgohen në Kopshtin Zoologjik deri në 15 ditë, ndërsa pronarët ngarkohen me shpenzimet dhe dëmet e shkaktuara. Autoritetet theksojnë se sfidë mbetet mungesa e pronarëve në vendngjarje, ndërsa kërkohet bashkëpunim më i gjerë mes pushtetit lokal, këshilltarëve dhe sektorit civil për ta adresuar situatën.