MPB: 1.337 raste të dhunës në familje deri në shtator

Në periudhën janar–shtator 2026 janë regjistruar 1.337 vepra penale të dhunës në familje, ku janë raportuar 1.388 autorë dhe 1.433 viktima, prej të cilave 1.144 janë gra, shumica e tyre bashkëshorte. Goce Andreevski nga MPB bëri të ditur se veprat penale më të shpeshta janë lëndimi trupor me 770 raste dhe rrezikimi i sigurisë me 527 raste.

Sipas të dhënave zyrtare, gjatë së njëjtës periudhë janë regjistruar edhe 191 kundërvajtje të dhunës në familje, për të cilat janë raportuar 228 autorë dhe 221 viktima, nga të cilat 95 janë gra. Krahas këtyre, janë regjistruar 3.869 ankesa për dhunë në familje, ku figurojnë 3.971 autorë të raportuar dhe 3.961 viktima, prej të cilave 2.567 janë gra, ndërsa ankesat më të shpeshta me 3.494 sosh kanë të bëjnë me keqtrajtimin psikik, siç deklaroi Goce Andreevski nga MPB.

Në një periudhë trevjeçare, te institucioni i avokatit të popullit janë parashtruar 40 parashtresa që lidhen me dhunën në familje, ndërsa shifrat tregojnë rritje nga viti në vit. Avokati i Popullit, Faton Selami, u theksua se në vitin 2024 janë dorëzuar 7 parashtresa, në vitin 2025 janë dorëzuar 14 parashtresa dhe në vitin 2026 janë parashtruar 19 parashtresa, ku viktimat ankohen për mosveprim ose veprim me vonesë të institucioneve, përfshirë policinë dhe qendrat për punë sociale.

Profesoresha universitare Imrane Morina theksoi se problemi i dhunës në familje lidhet me vlerat patriarkale në shoqëri, si dhe me mosguximin dhe pasigurinë e grave për ta paraqitur atë, duke shtuar se gratë ende nuk ndihen të sigurta për ta trajtuar dhunën dhe ekziston një mosbesim në institucione. Nga ana e saj, Zyrmrije Bela nga Organizata Joqeveritare Imago Plus deklaroi se dhuna nuk fillon gjithmonë si akt fizik, por nis me kontrollin, poshtërimin, izolimin, kërcënimin dhe kufizimin e lirisë personale, prandaj viktimat nuk duhet të presin deri në një situatë ekstreme për t'u marrë seriozisht. Ndërkohë, psikologu Arbër Kadriu bëri të ditur se mbi 45 për qind e rasteve të hasura përfshijnë dhunë dhe presion psikologjik ndaj gjinisë femërore, të cilat shpesh nuk gjejnë mbështetje as te familja dhe shoqëria.