Komuna e Lipjanit i jep 3 hektarë tokë kompanisë së vajzës së Blerim Devollit

Kuvendi Komunal i Lipjanit ka miratuar propozim-vendimin për dhënien në shfrytëzim për 99 vjet të 30 mijë metrave katrorë, respektivisht 3 hektarë tokë komunale në Zonën Kadastrale Konjuh për kompaninë “Birra Peja”, e cila gjendet në pronësi të vajzës së biznesmenit Blerim Devolli. Ky vendim është marrë në mbledhjen e mbajtur, ku propozim-vendimi është proceduar në seancë nga kryetari i Komunës, Imri Ahmeti, ndërsa dokumentacioni përfshin dy prona me sipërfaqe prej 12357 metrave katrorë dhe 17643 metrave katrorë.

Sipas dokumentacionit të siguruar, qëllimi i dhënies në shfrytëzim të këtyre pronave për kompaninë “Birra Peja” është ushtrimi i veprimtarisë prodhuese për ndërtimin e një fabrike për prodhimin e lëngjeve. Për sa i përket interesit ekonomik të Komunës së Lipjanit, në dokumente nuk përmendet ndonjë qira që duhet të paguajë kompania, por përfshihen terma si vlera investive e planifikuar prej 33,450,966.93 euro, sipërfaqja e madhe e fabrikës, numri i lartë i të punësuarve dhe afati 36-mujor për realizimin e projektit. Neni 2 i propozim-vendimit përcakton se të drejtat dhe obligimet e palëve do të rregullohen me kontratë të veçantë mes Kryetarit të Komunës dhe shfrytëzuesit të pronës.

Komisioni Vlerësues që trajtoi ofertën e kompanisë përbëhej nga Imri Semetishti, Drejtor për Planifikim, Urbanizëm dhe Mbrojtje të Mjedisit, Latif Ramadani, Drejtor për Buxhet dhe Financa, si dhe asamblistët Venhar Agushi nga LDK dhe Besim Jusufi nga PDK, krahas Bekim Krasniqit, Drejtor i OJQ-së “YAHR”. Gjatë seancës, propozim-vendimin e paraqiti Imri Semetishti, i cili deklaroi se gjithçka në këtë proces nga Komisioni u vendos me unanimitet. Ndërkohë, kryetari i Komunës, Imri Ahmeti, mori pjesë në pjesën e parë të seancës por i iku prezencës në pjesën e dytë kur u mor vendimi. Diskutimet për këtë vendim u zhvilluan gjatë seancës së Kuvendit Komunal, ku miratimi u arrit me 22 vota pro, 4 vota kundër nga Lëvizja Vetëvendosje dhe 2 abstenime.

Miratimi i këtij propozim-vendimi u kundërshtua ashpër nga Lëvizja Vetëvendosje, ku asamblistët Alban Salihu dhe Valenton Amerllahu mbajtën fjalime kundërshtuese. Asamblisti Alban Salihu u shpreh se «Bëhet fjalë për kompaninë që familjeve tona ju ka shërbyer ushqim me vaj palme», duke shtuar gjithashtu se do të vijë një moment kur këto vendime do të rishikohen dhe njerëzit do të marrin përgjegjësi. Nga ana tjetër, asamblisti Agon Bahtiri nga radhët e PDK-së ngriti vërejtje për kriteret e shpalljes, por në përfundim të fjalimit të tij i dha përkrahje miratimit të dhënies së pronës në shfrytëzim.

Kompania “Birra Peja” Sh.A. zotëron fabrikën e prodhimit të Birra Peja, ndërsa të dhënat e publikuara tregojnë se ajo lidhet me “Devolli Group”, ndonëse në Agjencinë për Regjistrimin e Bizneseve pronësia e saj figuron e ndryshuar ligjërisht.