Haradinaj: Së pari zhvillimi ekonomik, pastaj kostoja e jetesës

Deputeti i Aleancës, Ramush Haradinaj, ka vlerësuar se zhvillimi i vendit duhet të jetë prioriteti i parë i Qeverisë, duke theksuar se sektori privat mbetet shtylla kryesore e ekonomisë. Sipas tij, institucionet duhet të krijojnë kushte të favorshme, të ofrojnë siguri për investitorët e huaj e vendorë dhe të hartojnë politika fiskale në bashkëpunim të ngushtë me ta. «Zhvillimi ekonomik, kuptohet, është i pari, pastaj vjen edhe krejt kostoja e jetës, sigurimet shëndetësore dhe sigurimet e tjera», ka deklaruar Haradinaj, duke shtuar se qytetarët duhet të ndihen të sigurt.

Nga ana tjetër, Banka Botërore i konsideron investimet e huaja ndër shtytësit kryesorë të zhvillimit ekonomik të vendit, ndërkohë që të dhënat zyrtare tregojnë se një pjesë e konsiderueshme e tyre lidhet me diasporën dhe sektorin e patundshmërive. Për ta zbutur ndikimin e inflacionit, Qeveria kishte ndërmarrë masa si rritja e pagave në sektorin publik dhe lansimin e platformës «Superpuna» në vitin 2023 për subvencionimin e punëdhënësve. Megjithatë, ekspertët e ekonomisë vlerësojnë se rritja e pagave nuk është përkthyer domosdoshmërisht në përmirësim të standardit të jetesës për shkak të inflacionit të lartë që ka dëmtuar fuqinë blerëse.