Ribalancimi i buxhetit rrit investimet kapitale në Shkup

SHKUP — Kryetari i Qytetit të Shkupit, Orce Gjorgievski, njofton se është votuar ribalancimi i ri i buxhetit të Qytetit të Shkupit. Sipas tij, bazuar në rezultatet në korrik dhe gusht, tremujori i tretë pritet të jetë ndër më të mirët në historinë e qytetit.

Gjorgievski theksoi se nuk po krijohen borxhe të reja, por po shlyhen ato të vjetrat, ndërsa investimet kapitale po rriten. Me rishikimin e buxhetit janë paraparë projekte të reja, përfshirë ndërtimin e një ure dhe rruge që do të lidhin Gjorgje Petrovin me Sarajin, për të cilat janë paraparë 420 milionë denarë.

Gjithashtu janë siguruar 61 milionë denarë për Shkupin 2028 – Kryeqytetin Evropian të Kulturës, mjete shtesë për pacientët onkologjikë, 25 milionë denarë për rikonstruksionin e rrugëve më të vogla, si dhe 10 milionë denarë për pastrimin e deponive.