Durmishi: Shporta e shtatorit për familjen katër anëtarëshe kushtoi 58.117 denarë

Për një familje katëranëtarëshe, shporta mesatare konsumatore e Ministrisë së Ekonomisë për shtatorin ka kushtuar 58.117 denarë. Të dhënat u bënë të ditura nga ministri i Ekonomisë dhe Punës, Besar Durmishi, pas përfundimit të mbledhjes së Këshillit Ekonomiko-Social.

Gjatë mbledhjes së Këshillit Ekonomiko-Social janë shqyrtuar edhe çështje që lidhen me ditët jopune, punën të dielave dhe pagesën për orët e punës, ku deri më tani nuk janë paraqitur propozime konkrete nga palët. Përllogaritja e ministrisë përfshin gjithsej 11 kategori dhe 101 produkte ushqimore, duke u mbështetur te të dhënat e Entit Shtetëror të Statistikës për tetë qytete, çmimet e mbledhura në 23 tregje për pemë dhe perime, si dhe çmimet nga pesë zinxhirë të mëdhenj tregtarë dhe tre zinxhirë rajonalë tregtarë, sipas shpjegimeve të dhëna nga ministri Besar Durmishi. Ai shtoi se ndryshimet më të dukshme evidentohen te ushqimi dhe pijet, veshmbathja dhe këpucët, arsimi, banimi dhe shpenzimet komunale, ndërsa për kategoritë e mirëmbajtjes, mikpritjes, rekreacionit dhe kulturës, përllogaritja dalin më të larta.

Lidhur me kontrollet e rregullta, ministri Besar Durmishi theksoi se Inspektorati Shtetëror i Tregut kryen verifikime çdo tre muaj dhe deri tani nuk ka konstatuar rritje të marzheve tregtare mbi kufijtë e lejuar prej 10 ose 15 për qind dhe nuk ka zbuluar keqpërdorime të kësaj natyre. Përballë kësaj shporte të institucioneve, Lidhja e Sindikatave të Maqedonisë ka paraqitur një qasje tjetër në llogaritjen e shpenzimeve, ku shporta minimale sindikale për shtatorin arriti në 69.432 denarë, duke krijuar një diferencë prej 11.315 denarësh mes dy përllogaritjeve zyrtare dhe sindikale. Sipas kryetarit të KSOM-it, Marjan Ristevski, shporta e përgatitur nga sindikatat është mesatare dhe jo minimale, ndërsa Qeveria ka propozuar një shportë minimale rreth 12 mijë denarë më të ulët. Ndërkohë, shporta minimale sindikale për muajin tetor ka shkuar në 70.358 denarë, duke shënuar një rritje prej 926 denarësh krahasuar me shtatorin, ndërsa për familjet që jetojnë me qira në një banesë prej 60 metrash katrorë, shpenzimet e përllogaritura arrinë në shifrën prej 85.733 denarësh.

Ministri i Ekonomisë dhe Punës, Besar Durmishi, deklaroi se synimi i institucionit që drejton është sigurimi i një pasqyre të verifikueshme dhe transparente: «Qëllimi ynë nuk është të paraqesim një shifër më të ulët, por të sigurojmë një pasqyrë të verifikueshme, transparente dhe të bazuar në statistika të shpenzimeve familjare. Për shtatorin e vitit 2026, buxheti mesatar i konsumit të Ministrisë arriti në 58,117 denarë për një familje me katër anëtarë. Ai është ulur me 358 denarë, ose 0.6 përqind krahasuar me gushtin. Megjithatë, krahasuar me janarin, ai është rritur me 1,736 denarë, përkatësisht 3.1 për qind. Ne nuk na intereson lëvizja e afateve, si dhe presioni mbi buxhetin familjar».

Lidhur me masat dhe inspektimet ndaj tregtarëve, ministri Besar Durmishi u shpreh gjithashtu: «Shumë herë kemi thënë se inspektimet kontrollojnë marzhet e tregtarëve. Nëse gjatë kontrolleve konstatohet se marzhet janë rritur mbi 10 ose 15 për qind, kemi masa administrative me të cilat ndërhyjmë, përkatësisht, ashtu si edhe në periudhën e kaluar, miratojmë masa për kufizimin e marzheve. Kontrollet e deritanishme, të cilat kryhen çdo tre muaj, nuk kanë zbuluar keqpërdorime të tilla».

Lidhur me dallimet mes institucioneve dhe sindikatave, kryetari i KSOM-it, Marjan Ristevski, deklaroi: «Shporta që e përgatit Lidhja e Sindikatave të Maqedonisë, sipas profesorit që e harton atë, është shportë mesatare dhe jo minimale. Ndërkaq, Qeveria ka propozuar një shportë minimale, e cila është rreth 12 mijë denarë më e ulët».