Maqedonia e Veriut dhe ONP nënshkruajnë Programin Kombëtar për Punë të Denjë

Qeveria e Republikës së Maqedonisë së Veriut, organizatat e punëdhënësve, sindikatat dhe Organizata Ndërkombëtare e Punës nënshkruan Programin Kombëtar për Punë të Denjë për periudhën 2026–2030, duke siguruar një kornizë bashkëpunimi për rritje ekonomike gjithëpërfshirëse, vende pune cilësore, produktive dhe institucione më të fuqishme në tregun e punës.

Bota e punës në vend po ndryshon vazhdimisht përmes zhvillimit socio-ekonomik, ndërsa sfidat kryesore mbeten mungesa e fuqisë punëtore, emigrimi, ndryshimet demografike, mospërputhja mes ofertës dhe kërkesës për aftësi, pjesëmarrja e ulët e grave dhe të rinjve, puna joformale dhe produktiviteti i kufizuar. Për t'i dhënë zgjidhje këtyre problemeve, dokumenti i ri lidh reformat e tregut të punës me agjendën e gjerë të vendit për zhvillim të qëndrueshëm dhe me objektivat e integrimit evropian, duke u harmonizuar me Kornizën e Bashkëpunimit të Kombeve të Bashkuara për Zhvillim të Qëndrueshëm.

Sipas njoftimit zyrtar nga Ministria e Ekonomisë, dokumenti u hartua përmes konsultimeve trepalëshe dhe vendos tri fusha prioritare veprimi për tregun e punës. Fusha e parë përfshin krijimin e një mjedisi ekonomik mundësues përmes harmonizimit të legjislacionit të punës, sigurisë dhe shëndetit në punë, avancimit të dialogut social, negociatave kolektive dhe mbështetjes së ndërmarrjeve të vogla e të mesme produktive, konkurruese, inovative e të qëndrueshme. Fusha e dytë përqendrohet te avancimi i arsimit profesional dhe zhvillimi i aftësive për t'iu përgjigjur kërkesave të tregut. Fusha e tretë synon fuqizimin ekonomik të grave përmes mundësive të barabarta, heqjes së pengesave, adresimit të përgjegjësive të përkujdesjes, hendekut gjinor në paga, si dhe dhunës e ngacmimit në vendin e punës.

Ministri i Ekonomisë dhe Punës, Besar Durmishi, deklaroi se përmes këtij programi konfirmohet përkushtimi për krijimin e vendeve të punës më cilësore, më të paguara dhe më të sigurta. Ai theksoi se prioritetet përfshijnë avancimin e të drejtave të punëtorëve, zhvillimin e aftësive në përputhje me nevojat e tregut, përfshirjen më të madhe të të rinjve dhe grave, si dhe zvogëlimin e ekonomisë joformale. Durmishi shtoi se suksesin e programit do ta masin përmes përmirësimeve konkrete që do t'i ndiejnë punëtorët dhe kompanitë, që puna e denjë të bëhet realitet për çdo qytetar.

Ndërkaq, drejtoresha e ONP-së për Evropën Qendrore dhe Lindore, Claire Harasty, u shpreh se përmes përkushtimit dhe angazhimit të përbashkët mund të ndërtohet një treg pune më gjithëpërfshirës, produktiv dhe rezistent. Ajo shtoi se bashkëpunimi mundëson krijimin e vendeve të punës cilësore, forcimin e institucioneve të tregut të punës, mbështetjen e ndërmarrjeve të qëndrueshme dhe realizimin e parimeve dhe të drejtave themelore në punë.