Punëtori plagoset në Pogradec pasi bie nga skela gjatë punës
Një 58-vjeçar është dërguar me urgjencë drejt Tiranës për trajtim të specializuar pas një aksidenti në Pogradec.
Redaksia ZHURMA · · 1 min lexim
POGRADEC — Një aksident në vendin e punës është regjistruar në lagjen numër 1 të Pogradecit, ku një 58-vjeçar është rrëzuar nga skela teksa po punonte në një kantier pallati në ndërtim. Ngjarja ka ndodhur kur një material ndërtimi i ka rënë nga dora një punëtori tjetër, konkretisht vëllait të të plagosurit, duke e goditur atë në kokë dhe duke i shkaktuar një frakturë të rëndë.
Pas marrjes së ndihmës së parë në spitalin e qytetit, i plagosuri i identifikuar si A. Gora është nisur me ambulancë drejt traumës në Tiranë për të përfituar trajtim më të specializuar mjekësor. Pavarësisht dëmtimeve të marra në kokë, ai ndodhet paraprakisht jashtë rrezikut për jetën, ndërkohë që autoritetet policore kanë nisur veprimet hetimore për zbardhjen e rrethanave dhe përcaktimin e shkaqeve të ngjarjes.
