Punëtori nga Kosova bie nga skela në Gjermani dhe dërgohet me helikopter

Një 24-vjeçar nga Kosova ka pësuar lëndime pasi është rrëzuar nga një skelë në një objekt ndërtimi në Wilburgstetten të Gjermanisë. Ngjarja ka ndodhur të shtunën pasdite, më 24 tetor, gjatë punimeve në fasadën e një ndërtese të re, ndërsa i riu po punonte së bashku me një koleg në lartësinë e katit të dytë.

Platforma e skelës u shkëput papritur, duke bërë që punëtori të bjerë në tokë dhe të pësojë një plagë të hapur në pjesën e ballit si dhe një lëndim në kanalin e veshit. Sipas policisë, ai humbi përkohësisht vetëdijen por u përmend më vonë, kurse kolegu i tij ndodhej në anën tjetër të ndërtesës dhe dëgjoi vetëm rënien.

Për shkak të lëndimeve, i riu u transportua me helikopter të emergjencës në Spitalin Universitar të Augsburgut. Mjeku i emergjencës përjashtoi rrezikun për jetën, ndërsa autoritetet nuk kanë dhënë detaje të tjera për gjendjen e tij shëndetësore.