Vrasja e Denaldo Maxhallakut në Itali: Daniele Sartini pranon autorësinë

Shtetasi italian Daniele Sartini, 29 vjeç, ka pranuar para hetuesve se ka vrarë me armë zjarri bojaxhiun shqiptar 31-vjeçar Denaldo Maxhallaku nga Gatteo. Krimi ndodhi në Longiano të Italisë, ku trupi i pajetë u gjet dy ditë më parë brenda një pusi. I dyshuari ndodhet i arrestuar në burgun e Forlì-t nga policia.

Ngjarja ka marrë udhë me kallëzimin e bërë nga bashkëshortja e Denaldo Maxhallakut për zhdukjen e tij, çka ka nxitur nisjen e kërkimeve nga autoritetet policore. Trupi i pajetë i bojaxhiut 31-vjeçar u zbulua më pas nga hetuesit në një pus rreth 10 metra të thellë në zonën e Felloniche, në komunën e Longiano-s pranë Cesena-s. Pusi shërbente si një gropë prej betoni për kullimin e ujërave pranë fushave. Hetuesit sqaruan se vrasja kishte ndodhur më 7 tetor, saktësisht 21 ditë përpara se trupi i viktimës të zbulohej në pusi.

Kthesa vendimtare në hetime erdhi pas analizimit të regjistrave të telefonatave nga policia, ku u konstatua se Daniele Sartini kishte qenë personi i fundit që kishte pasur kontakt me viktimën. Pas arrestimit nga policia, 29-vjeçarit nga Longiano iu sekuestruan pistoleta e përdorur në krim dhe veshjet e tij. Hetimet zbuluan se Sartini, i cili është përdorues i lëndëve narkotike, i detyrohej viktimës një borxh prej 1.500 eurosh për drogë. Atë mbrëmje, të dy personat kishin lënë një takim për të diskutuar lidhur me këtë shumë përpara banesës së Sartinit në Longiano, ku ai jetonte me të atin. Nën presionin e Maxhallakut i cili kërkonte me ngulm paratë e tij, Sartini, i cili ndodhej vetëm në shtëpi, ka hyrë brenda pas një debati verbal dhe ka marrë pistoletën e llojit Glock të kalibrit 40. Sipas detajeve të hetimit, ai ka qëlluar tri herë në drejtim të gjoksit të Maxhallakut, i cili ka ndërruar jetë menjëherë në vendngjarje. Më pas, i dyshuari e ka vendosur trupin e pajetë në makinë dhe e ka hedhur në pusin prej betoni. Për të zhdukur gjurmët e krimit, ai me pas i ka vënë flakën makinës së bojaxhiut shqiptar. Sartini u dorëzua pas një seance të gjatë marrjeje në pyetje nga hetuesit dhe aktualisht akuzohet zyrtarisht për vrasje dhe fshehje të kufomës.

Për sa i përket hapave të mëtejshëm të procedurës gjyqësore, autopsia mbi trupin e viktimës është caktuar të kryhet gjatë ditëve të ardhshme nga ekspertët ligjorë. Po ashtu, prokurori i çështjes njoftoi se pritet vendimi i parë nga gjyqtari i hetimeve paraprake për caktimin e masës ndaj të arrestuarit.

Gjatë procesverbalit të marrjes në pyetje, i akuzuari Daniele Sartini deklaroi me gojën e tij para hetuesve: «Kam qenë unë». Ai arsyetoi veprimet e tij duke shtuar: «Kam pasur frikë për veten dhe familjen time, jam ndier i kërcënuar». Ndërkohë, prokurori i çështjes deklaroi se Daniele Sartini ka dhënë një rrëfim të plotë që sqaron çdo aspekt të ngjarjes, duke theksuar se ai e fshehu kufomën që të mos gjendej dhe u përpoq të zhdukte çdo provë që mund ta lidhte me zhdukjen e këtij personi.