Pandeli Dervishi dënohet me 7.5 vite burg në Mbretërinë e Bashkuar

Shtetasi shqiptar Pandeli Dervishi, 24 vjeç, është dënuar nga Gjykata e Kurorës në Leicester me shtatë vjet e gjashtë muaj burgim për përdhunimin e një adoleshenteje 17-vjeçare në tualetin e një lokali në Mbretërinë e Bashkuar. I riu ishte shpallur në kërkim nga autoritetet policore pasi kishte thyer masën e lirisë me kusht, ndërsa kapja e tij u bë e mundur pasi kaloi me semafor të kuq me një makinë të bardhë.

Ngjarja e rëndë ka ndodhur të mërkurën e 1 tetorit brenda hapësirave të tualeteve në një lokal të vendosur në zonën The Newarke në Leicester. Sipas të dhënave nga hetimi, 24-vjeçari e sulmoi seksualisht vajzën e mitur dhe e detyroi atë të kryente seks oral me të. Oficerët e policisë mbërritën me urgjencë në vendngjarje menjëherë pas denoncimit, duke e arrestuar Dervishin në vend dhe duke nisur kështu një hetim urgjent për zbardhjen e të gjitha rrethanave të ngjarjes. Pavarësisht gravitetit të incidentit, i arrestuari u la më pas në liri me kusht nga autoritetet përkatëse derisa hetime të mëtejshme po vijonin.

Gjatë periudhës kur i dyshuari ndodhej në liri me kusht, ai u arratis për t'i shpëtuar përballjes me drejtësinë britanike. Hetuesi i çështjes zhvilloi verifikime të hollësishme duke shqyrtuar regjistrat financiarë si dhe të dhënat e thirrjeve telefonike të Dervishit, përmes të cilave arriti të përcaktonte se ai ndodhej me shumë gjasa në zonën e Guildfordit, në qarkun Surrey.

Arrestimi i tij përfundimtar erdhi në orët e para të mëngjesit të 16 prillit, kur Dervishi u pikas nga patrullat rrugore ndërsa po drejtonte një automjet të bardhë të tipit Mazda. Pasi ai kreu një shkelje të rregullave të qarkullimit rrugor duke kaluar me semafor të kuq, një zyrtar policor nga Surrey iu vu menjëherë nga mbrapa dhe e ndaloi. Verifikimet e mëtejshme në sistemin policor konfirmuan zyrtarisht se personi i ndaluar ishte pikërisht i kërkuari nga Policia e Leicestershire-it, çka çoi në ngritjen e menjëhershme të akuzave për përdhunim dhe dërgimin e tij përballe trupit gjykues.

Gjykata e Kurorës në Leicester mbylli shqyrtimin gjyqësor ndaj 24-vjeçarit shqiptar duke e shpallur atë fajtor dhe duke dhënë dënimin përfundimtar me shtatë vite e gjysmë heqje lirie. Me këtë vendim, Dervishi do të vuajë dënimin e caktuar në një nga institucionet e ekzekutimit të vendimeve penale në Mbretërinë e Bashkuar.