Hetimet zbardhin detajet e reja të aksidentit në autostradën A1

Autoritetet italiane kanë nisur hetimet për të zbardhur dinamikën e plotë të ngjarjes tragjike ku humbi jetën Thomas Qirjaj, pasi makina me të cilën udhëtonte u përplas me barrierën ndarëse në autostradën A1. Për këtë ngjarje po punojnë Policia Rrugore e Guardamiglios dhe Prokuroria e Lodit, ndërsa ndaj drejtuesit të fuoristradës pritet të kryhen testet toksikologjike sipas procedurave standarde për raste të tilla. I riu kishte zbritur nga automjeti tip «Volvo» për të vendosur trekëndëshin e emergjencës në rrugë, pasi ai dhe katër miqtë e tij po udhëtonin në drejtim të Milanos dhe kishin kaluar pikën e pagesës në Melegnano. Në atë moment, ai u godit nga një SUV i drejtuar nga një 25-vjeçar nga Modena, i cili nuk e kishte vënë re praninë e tij në karrexhatë deri në momentin e fundit. Pavarësisht ndërhyrjes së shpejtë të ekipeve të shpëtimit, 20-vjeçari u transportua në gjendje kritike në spitalin Predabissi, ku ndërroi jetë nga plagët e rënda. Katër shokët e tij nuk pësuan dëmtime të rënda.

Kryetarja e bashkisë, Roberta Battaglia, shprehu ngushëllimet për familjen, duke e kujtuar të ndjerin si një djalë të integruar mirë dhe fëmijë të vetëm të një familjeje shqiptare të vendosur prej vitesh në Caorso, ndërsa babai i tij është i punësuar në Zvicër. Ngjarja ndodhi gjatë natës mes të enjtes dhe të premtes, teksa i riu, i lindur në Piacenza, do të mbushte 21 vjeç në dhjetor.