Hetimet në Gjermani përfshijnë edhe një shtetas kosovar për sulm terrorist
Autoritetet gjermane po hetojnë një 19-vjeçar me shtetësi gjermane dhe kosovare, ndërsa një ngjarje tjetër në Mynih ka çuar në arrestimin e një shqiptari për plagosje.
Redaksia ZHURMA · · 2 min lexim
Një 19-vjeçar nga Hagen, i cili ka shtetësi gjermane dhe kosovare, po hetohet në Gjermani nën dyshimet për planifikimin e një sulmi terrorist, pasi autoritetet zbuluan bisedat e zhvilluara gjatë muajit shtator për sigurimin e armëve të luftës të tipit AK-47, të cilat sipas hetimeve planifikoheshin të siguroheshin për nga 1.000 euro secila. Gjatë bastisjeve të kryera më 1 tetor nga forcat speciale në disa banesa në Unna dhe Hagen nuk u gjetën armë, ndërsa Prokuroria e Përgjithshme në Düsseldorf ka konfirmuar masën e paraburgimit për një 23-vjeçar nga Unna për shkak të rrezikut të arratisjes, kurse 19-vjeçari nuk është dërguar në paraburgim pasi mungojnë arsyet ligjore dhe mund të lirohet së shpejti.
Në një zhvillim tjetër të raportuar në Mynih, një 31-vjeçar me shtetësi shqiptare është arrestuar më 29 tetor pranë banesës së tij, nën dyshimin se ka plagosur rëndë me mjet të mprehtë një 29-vjeçar nga Kosova, i cili kishte ndërhyrë më 2 shtator për të ndalur një konflikt mes një burri dhe një gruaje në qendër të qytetit. Viktima kishte pësuar lëndime të rënda në pjesën e sipërme të trupit dhe ishte dërguar me urgjencë në spital për t'i u nënshtruar një ndërhyrjeje kirurgjikale, ndërsa hetimet e deritanishme tregojnë se dy personat nuk njiheshin më parë dhe i dyshuari është dërguar në paraburgim.
