Pse biblioteka shqipe në Sheshin 'Skënderbeu' mbetet vetëm në letër?

SHKUP — Transformimi i sheshit ‘Skënderbeu’ në bibliotekë shqipe vazhdon të jetë vetëm premtim dhe procedurë në letër, pa asnjë lëvizje konkrete në terren, edhe një muaj pas deklaratës së kryetarit të Komunës së Çairit, Izet Mexhitit.

Në fillim të qershorit, Mexhiti njoftoi se do të nisej procedura për shndërrimin e kupolave në bibliotekë moderne, të hapur për nxënës, studentë dhe qytetarë. Megjithatë, deri më tani nuk ka pasur asnjë aktivitet në vendngjarje, ndërsa detajet e projektit mbeten të paqarta.

Qytetarë dhe studentë shprehen skeptikë për realizimin e projektit. Një banor i Çairit thotë se janë mësuar me premtime të paverifikuara: "Jemi mësuar me premtime të llojeve të ndryshme, por në praktikë ato nuk po realizohen gati se asnjëherë."

Një student thekson rëndësinë e bibliotekës për komunitetin: "Projekti është i nevojshëm dhe nëse realizohet, do të jetë një ndihmë e madhe për studentët. Uroj që të mos mbetet vetëm një ndërhyrje formale, por një hapësirë funksionale."

Komuna e Çairit konfirmon se projekti mbetet prioritet, por aktualisht po punohet vetëm në përgatitjen e konceptit dhe dokumentacionit projektues. Paralelisht, po zhvillohet bashkëpunim me shtëpi botuese nga Maqedonia e Veriut, Shqipëria dhe Kosova për krijimin e një fondi librash në gjuhën shqipe.

Kupolat gjysmësferike në Sheshin ‘Skënderbeu’, të ndërtuara në vitin 2012 dhe inauguruar në 2017, kishin funksionuar si hapësirë e mbuluar për mbrojtje nga moti. Megjithatë, mungesa e mirëmbajtjes i ka dëmtuar me kalimin e viteve, ndërsa në 2023 disa prej tyre ishin shndërruar në strehë për persona të pastrehë.

Mexhiti nuk ka sqaruar ende statusin administrativ të bibliotekës, por ka theksuar se ajo do të pasurojë jetën kulturore të komunës dhe do të ofrojë qasje në literaturë për të gjitha brezat. Komuna premton se do të informojë opinionin për fazat e ardhshme të projektit.

*Burim: Portalb*
— Redaksia ZHURMA