Prokuroria nis hetimet për mësuesin e fiskulturës në Selenicë

VLORË — Materialet procedurale për mësuesin e edukimit fizik në Vlorë, i cili u ndalua pasi shtatë nxënëse të moshave 14 deri në 17 vjeçe e kallëzuan për ngacmim seksual, i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme. Ngjarja ka në qendër shkollën e bashkuar “Hajredin Beqari” në Selenicë, ku 35-vjeçari Albano Ameti u denoncua fillimisht në drejtorinë e institucionit arsimor dhe më pas Zyra Arsimore e Selenicës njoftoi Policinë e Vlorës, e cila ndërhyri për ndalimin e tij.

Pas denoncimit të bërë nga nxënëset e shkollës së bashkuar “Hajredin Beqari”, autoritetet policore zhvilluan veprimet e para hetimore duke marrë në pyetje edhe nxënës e persona të tjerë që mund të kishin dijeni për rrethanat e ngjarjes.

Në detajet e zbardhura nga hetimet paraprake dhe dëshmitë e publikuara, njëra prej shtatë vajzave që firmosën kallëzimin tregoi në Polici se personalisht nuk kishte qenë e prekur nga veprimet e mësuesit, por kishte qenë e pranishme dhe kishte vënë re sjelljet e tij ndaj shoqeve të shkollës. Mamaja e kësaj nxënëseje deklaroi se profesori kishte muaj që kishte hyrë në shkollë dhe se kishte ngacmuar vazhdimisht vajzat me prekje fizike e gjeste të papërshtatshme. Ndërkohë, një nxënës i mitur i së njëjtës shkollë tregoi se e kishte dëgjuar mësuesin duke u folur nxënëseve me fjalë të caktuara, ndërsa kolegët e stafit pedagogjik kanë dhënë qëndrime të ndryshme, ku disa shprehen se nuk kishin pasur ankesa dhe se marrëdhëniet ishin korrekte, kurse të tjerë ndihen të tronditur nga skandali.

Policia e Vlorës vijon hetimet për dokumentimin e plotë të rrethanave të ngjarjes, ndërsa çështja tashmë ka kaluar në duart e Prokurorisë për hapat e mëtejshëm ligjorë ndaj 35-vjeçarit.

«U ndalua shtetasi A. A., 35 vjeç, banues në Vlorë, mësues i edukimit fizik në një shkollë, pasi kanë kallëzuar 7 nxënëse të kësaj shkolle, të moshave 14–17 vjeçe, se ky shtetasi i ka ngacmuar seksualisht në ambientet e shkollës», njoftoi policia. Nga ana e tyre, nxënësit dhe prindërit e pranishëm në zonë kanë treguar detaje të tjera për sjelljen e mësuesit. «Mësuesin e fiskulturës e arrestuan se ngacmonte vajzat, i godiste. I ngacmonte me fjalë domethënë si “hajde te lali zemra”», u shpreh nxënësi i mitur i shkollës ku ndodhi ngjarja. Ndërkohë, një nga kolegët e stafit, mësuesi i anglishtes, deklaroi lidhur me situatën se nuk kishin pasur asnjë ankesë më parë: «E njoh, e kam koleg. Marrëdhëniet tona kanë qenë brenda normave. Punojmë bashkë që në fillim të vitit shkollor. Me ne ka qenë korrekt, por edhe me nxënësit, korrekt. Na vjen turp që jemi mësues, jemi të sulmuar nga të gjithë krahët. Jemi të zhveshur nga gjithçka.»