Pensionistët e Vlorës heqin dorë nga kondicioneri në vapë për të paguar ilaçet
Disa prej tyre e kanë kondicionerin në shtëpi, por nuk e ndezin nga frika e faturave dhe e përdorin vetëm 30 deri 60 minuta në ditë.
VLORË — Pensionistët e qytetit thonë se përdorimi i kondicionerit gjatë ditëve me nxehtësi ekstreme mbetet një shpenzim që shumica prej tyre nuk mund ta përballojë, teksa kërkojnë rritje të pensioneve. "Po ç'a kondicioneri me 200 mijë lek pension? Qeveria duhet të na shohë, të ngrihen tamam pensionet", tha një banor i qytetit.
Shumë të moshuar që kanë kondicioner në shtëpi shmangin përdorimin e tij nga frika e faturave të energjisë elektrike, pasi përparësi mbeten ilaçet dhe ushqimi. "Kemi kondicioner, por kur vjen puna për të paguar, nuk e dimë sa do na vejë… Kam, po s'e ndez se s'kam me se ta paguaj. E vëmë 30 minuta, 1 orë", tha një pensionist.
Për të tjerë, edhe shpenzimet elementare janë të vështira: pensioni nuk mjafton njëkohësisht për qiranë, ilaçet dhe faturat. "Jam me çadra në shtëpi. Hapim dritare, dyer, të futet ajër. Nuk kam mundësi për kondicioner… Jam me qira, 190 marr, po ilaçe marr 100 mijë lek", tha një grua nga Vlora.
Në ditët kur temperaturat arrijnë vlera të larta, pensionistët e Vlorës thonë se detyrohen të zgjedhin mes nevojave bazë dhe komoditetit. Ata kërkojnë rritje të pensioneve dhe më shumë mbështetje shtetërore, në mënyrë që vitet e pleqërisë të jetohen me më shumë siguri dhe dinjitet.
Burim: Euronews Albania
— Redaksia ZHURMA