Çfarë të bëjnë pensionistët vlonjatë kur plazhet kushtojnë shumë?

VLORË — Pensionistët vlonjatë po zgjedhin plazhet publike në vend të plazheve private, duke marrë me vete çadrat personale dhe duke qëndruar në bregdet — në shkallë, gurë a shkëmbinj — pa asnjë shërbim shtesë. Tarifat për çadrat dhe shezlongët në plazhet private arrijnë deri në 700 lekë, shumë e papërballueshme, sipas tyre, me pensionet aktuale.

Një pjesë e konsiderueshme e qytetarëve në Vlorë është e privuar nga mundësia për të pushuar — jo për mungesë plazhesh apo destinacionesh, por për shkak të pamundësive ekonomike. Pensionet dhe pagat e ulëta, sipas tyre, nuk u lejojnë të mbulojnë kostot e një dite në plazh.

"Me këtë plazh, me 7 mijë lekë çadra, nuk ia dalim dot, ndaj vijmë këtu në rërë," thotë një pushuese. Ajo kërkon që plazhi ta bëjë çadrën me 2 deri në 3 mijë lekë, një tarifë që, sipas saj, do t'u jepte të gjithëve mirëqenien e munguar.

"Mirë po kalojmë, deti shumë i mirë, po keq janë shezlongët që i kanë sjellë deri tutje," thotë një zonjë. "Mundësi ekonomike kam deri këtu te shkallët, atje s'vete dot se pensioniste jam," shton ajo, duke pohuar se me pensionin aktual nuk arrin kurrë t'i përballojë shpenzimet e plazhit.

"Ne pensionistët na kanë hequr nga lista fare. I kanë degdisur atje poshtë për t'i hequr qafe," thotë një zotëri. Ai shton se pensionet e tyre nuk mbulojnë as shpenzimet ditore për pesë ditë, e jo më për një muaj, dhe kërkon rritjen e pensioneve.

Përtej rasteve individuale, kërkesa e përbashkët e pensionistëve është e qartë: më shumë hapësira publike falas në bregdet, si dhe ndërhyrje shtetërore për përmirësimin e gjendjes ekonomike, përmes rritjes së pagave dhe pensioneve.

Mesazhi i tyre mbetet i qartë: bregdeti u takon të gjithëve, por sot, pa çadër falas, pensionistët e Vlorës e shijojnë detin nga rëra, jo nga shezlongët e paguar.

Burim: Euronews Albania
— Redaksia ZHURMA