Berisha: Paketa e re fiskale çon drejt falimentimit mijëra biznese

Kreu i Partisë Demokratike, Sali Berisha, ka dalë kundër paketës së re fiskale të paralajmëruar nga qeveria, duke akuzuar kryeministrin Edi Rama se po rëndon barrën tatimore mbi bizneset shqiptare. Në një videomesazh nga selia e Partisë Demokratike, ai deklaroi se ndryshimet e propozuara parashikojnë rritjen e taksës mbi dividentin nga 8% në 15% dhe të tatimfitimit nga 15% në 17%.

Sipas liderit demokrat, paketa përfshin gjithashtu uljen e pragut të xhiros për regjistrimin në TVSH nga 10 milionë në 5 milionë lekë. Berisha argumentoi se këto masa do të sjellin vështirësi për sipërmarrjet, duke rrezikuar mbylljen e bizneseve dhe humbjen e qindra mijëra vendeve të punës, ndërsa premtoi se Partia Demokratike do të anulojë këtë paketë dhe do të vendosë taksën e sheshtë 10%.