Monumenti simbolik në Preshevë vishet me portretet e figurave kombëtare

Në prag të festave të Nëntorit, monumenti simbolik “PRESHEVA” në Luginën e Preshevës ka marrë një pamje të re përmes një koncepti kushtuar historisë dhe personaliteteve të shquara të kombit. I organizuar nën moton “NëntorLugine”, ky projekt synon të forcojë identitetin kombëtar dhe kujtesën historike të banorëve.

Çdo shkronjë e emrit të monumentit është pajisur me portretin e një figure të shquar: Gjergj Kastrioti Skënderbeu përfaqësohet te shkronja P, Abdyl Frashëri te R, Ismail Qemali te E e parë, Idriz Seferi te S, Hasan Prishtina te H, Parashqevi Qiriazi te E e dytë dhe Ibrahim Kelmendi te shkronja A. Gjithashtu, hapësira e shkronjës V përmban një zemër të kuqe me shqiponjën dykrenare dhe mbishkrimin përkatës.

Ky instalim pritet të shërbejë si një ndër pikat kryesore të atmosferës festive gjatë kremtimit të 28 Nëntorit, Ditës së Flamurit dhe përvjetorit të Pavarësisë së Shqipërisë, si dhe 29 Nëntorit.