Ravanelli mbron Zhegrovën dhe kërkon më shumë hapësirë te Juventusi
Ish-sulmuesi i Juventusit, Fabrizio Ravanelli, ka kërkuar që Edon Zhegrova dhe Kerim Alajbegoviçi të kenë më shumë hapësirë në formacionin e Luciano Spallettit.
Redaksia ZHURMA · · 1 min lexim
Fitorja e Juventusit kundër Napolit ka sjellë në vëmendje diskutimet mbi potencialin e skuadrës bardhezi, ndërsa ish-sulmuesi legjendar i klubit, Fabrizio Ravanelli, ka veçuar Edon Zhegrovën dhe Kerim Alajbegoviçin si lojtarë që duhet të aktivizohen rregullisht. Gjatë paraqitjes së tij në emisionin «Penna Bianca» në YouTube, Ravanelli theksoi se skuadrës i mungon personaliteti në momente të vështira dhe vlerësoi kontributin e Alajbegoviçit në ndeshjen e fundit. «Gjithmonë kemi thënë se Juventusit i mungon personaliteti. Mbrëmë, ndeshjen e vendosi një lojtar 19-vjeçar, prandaj ose e ke personalitetin, ose nuk e ke», u shpreh ai.
Ravanelli shfaqi gjithashtu habinë e tij për minutat e pakta që i jepen reprezentuesit të Kosovës, Edon Zhegrovës, duke kërkuar që ai të jetë një nga lojtarët kryesorë të skuadrës. Sipas tij, aksioni i Zhegrovës kundër Napolit kontribuoi në realizimin e golit. «Nuk mund ta kuptoj pse Zhegrova nuk arrin kurrë ta nisë ndeshjen si titullar. Nëse shkoj në luftë, dua lojtarë të tillë», deklaroi ish-sulmuesi, duke shtuar se të dy futbollistët duhet të jenë në fushë pavarësisht përshtatjes së ekipit nga trajneri Luciano Spalletti.
