Në Rakiq u organizua Festa Tradicionale e Kungullit

Në një atmosferë të ngrohtë vjeshtore pranë lumit Cem dhe ujëvarës së Niagarës, në Rakiq u mbajt Festa e Kungullit nën përkujdesjen e Organizatës Turistike të Tuzit. Ky aktivitet mblodhi prodhues, artizanë dhe vizitorë të shumtë nga Malësia, Ulqini, Podgorica, Kraja dhe treva të tjera, të cilët prezantuan produktet e tyre tradicionale, ushqimet shtëpiake dhe punimet artizanale.

Në këtë ngjarje tradicionale morën pjesë edhe nxënësit e shkollës qendrore të Tuzit, «Mahmut Lekiq», me krijimtarinë e tyre për të promovuar vlerat vendore. Për atmosferën festive u kujdes këngëtarja ulqinake Eliza Markiq së bashku me bendin e saj, duke sjellë interpretim muzikor për të pranishmit në këtë mjedis natyror.