Ministria e Shëndetësisë: Pesë fëmijë të paraqitur në spital në Vlorë
Pesë raste me simptoma gastroenteriti janë paraqitur në Spitalin Rajonal të Vlorës, ndërsa strukturat shëndetësore kanë nisur analizat laboratorike.
Redaksia ZHURMA · · Përditësuar · 1 min lexim
VLORË — Pesë fëmijë janë paraqitur në Spitalin Rajonal të Vlorës me simptoma të gastroenteritit, pasi dyshohet për helmim nga ushqimi në kopshtin numër 10 të qytetit. Sipas njoftimit zyrtar të Ministrisë së Shëndetësisë, katër rastet e para u shfaqën gjatë ditës së djeshme, ndërsa një tjetër u regjistrua sot.
Pas konstatimit të rasteve pediatrike, në vendngjarje ka ndërhyrë Njësia Vendore e Kujdesit Shëndetësor Vlorë, specialistët e së cilës kanë marrë mostrat për analizat përkatëse laboratorike. Spitali Rajonal, në bashkëpunim të ngushtë me strukturat e shëndetit publik, po ndjek të gjitha procedurat për menaxhimin e situatës, ndërkohë që vijon hetimi epidemiologjik për identifikimin e shkakut të saktë.
