Erion Veliajt i përkeqësohet këmba, mjekët rekomandojnë operacion tjetër

Kryetari i Bashkisë së Tiranës, Erion Veliaj, pritet t’i nënshtrohet një tjetër ndërhyrjeje kirurgjikale në këmbën e thyer pas përkeqësimit të gjendjes së saj. Vendimi është marrë pas një ekzaminimi të kryer të shtunën në Spitalin Memorial të Fierit, ku mjekët i kanë rekomanduar atij kryerjen e operacionit.

Siç raportoi Zhurma më 4 nëntor 2026, kryebashkiaku i Tiranës ishte zhvendosur në sektorin spitalor të burgut të Fierit pas gjetjeve të Komitetit të Helsinkit dhe ankesave për frakturën në këmbën e tij.

Raportimet televizive shpjegojnë se dyshimet për përkeqësimin e shëndetit të këmbës lidhen me vonesat në kryerjen e ekzaminimeve, moslejimin e tij për t’u kontrolluar në kohën e duhur dhe me faktin se ai nuk u ekzaminua në spitalin që kishte kërkuar. Më parë, avokati i tij Plarent Ndreca i ishte drejtuar me një email Drejtorisë së Burgjeve, ku kërkonte që radiografia e këmbës të kryhej urgjentisht. Ndreca njoftoi se mjeku Flamur Kadriu kishte vizituar klientin e tij në Spitalin e Burgut, ku evidentoi problematika me ndjeshmërinë e këmbës dhe vlerësoi se ndërhyrja ishte urgjente, pasi ekzaminimi duhej të ishte kryer shumë ditë më parë.

Në kërkesën e tij drejtuar autoriteteve, avokati Ndreca paralajmëroi se çdo vonesë e mëtejshme përbën mosveprim që sjell përgjegjësi civile dhe penale për zyrtarët përgjegjës, duke theksuar se ekzistojnë arsye serioze për të verifikuar nëse vonesat kanë qenë të qëllimshme. Ai vuri në dukje se klienti i tij vazhdon të mbajë çizmen ortopedike prej disa javësh dhe se gëzon të drejtën për kujdes të duhur shëndetësor.

Avokati Plarent Ndreca tha se Veliaj e ka njoftuar personalisht në telefon për operacionin e ri. Ndreca tha se Veliaj i shpjegoi se këmba i është përkeqësuar prej mosekzaminimit në kohë dhe se doktorët e Spitalit Memorial në Fier i rekomanduan operacionin e dytë pasi bëri kontrollet mjekësore.