Mickoski: Iva Mihailova ka kaluar ilegalisht në Bullgari

Kryeministri Hristijan Mickoski deklaroi gjatë një konference për shtyp në qeveri se Iva Mihailova dhe babai i saj, Simeon, do të mbahen përgjegjës në një moment të caktuar, pasi të dy u larguan nga Maqedonia. Ministria e Brendshme po heton se si Mihailova u transferua në Bullgari.

Mickoski i quajti të rreme raportimet e mediave bullgare se ajo dhe avokati i saj kishin kaluar përmes një pike të rregullt kufitare. Ai tha se sipas të dhënave të regjistruara, të konfirmuara edhe nga pala bullgare, avokati ka hyrë më 28 shtator, dhe konfirmoi se ajo është transferuar ilegalisht në Bullgari.

Lidhur me babanë e saj, Simeon Mihailov, i cili është i dënuar në çështjen e njohur si «Detonator» për tentativë vrasjeje, kryeministri tha se ai gjithashtu do të mbahet përgjegjës në një moment të caktuar. Ai tha se udhëheqja politike në Bullgari po përpiqet të tregojë muskuj politik dhe nuk e kupton dëmin që po i shkakton vetes në nivel ndërkombëtar.