Afrim Gashi merr pjesë në Konferencën Evropiane të Kryetarëve të Parlamenteve në Romë

Kryetari i Kuvendit të Maqedonisë së Veriut, Afrim Gashi, po merr pjesë në Konferencën Evropiane të Kryetarëve të Parlamenteve në Romë. Ky organizim mbahet nën patronazhin e Asamblesë Parlamentare të Këshillit të Evropës dhe shënon gjysmëshekullin e mbajtjes së takimit të parë të këtij formati në kryeqytetin italian, i cili daton nga viti 1975.

Sipas njoftimit të shërbimit për shtyp të Kuvendit, gjatë këtij forumi të nivelit të lartë, drejtuesit e parlamenteve do të diskutojnë rreth sfidave të institucioneve demokratike, ndikimit të teknologjisë në tregun e punës dhe shoqëri, si dhe rëndësinë e bashkëpunimit ndërkombëtar për ballafaqimin me krizat aktuale. Në kuadër të punimeve është paraparë edhe një takim i posaçëm i sekretarëve të përgjithshëm, ku do të marrë pjesë sekretarja e përgjithshme e Kuvendit, Marina Dimovska, me fokus te transparenca, integriteti dhe etika.

Konferenca mbledh çdo dy vjet kryetarët e legjislativëve nga 46 vende anëtare të Këshillit të Evropës, krahas delegacioneve me status partneri, vëzhguesi dhe përfaqësuesve të asambleve ndërkombëtare.