MPB: Iva Mihailova nuk ka daljesh të regjistruar nga vendi

Iva Mihailova nga Koçani, për të cilën është në fuqi një ndalim aktiv gjyqësor dhe të cilës i janë konfiskuar dokumentet personale si masë parandaluese në kuadër të procedurës gjyqësore ku akuzohet për një aksident trafiku me fatalitet, nuk ka dalje të regjistruar nga territori i Maqedonisë. Sipas njoftimit të Ministrisë së Punëve të Brendshme, kontrollet e kryera në sistemin e kontrollit kufitar tregojnë se ajo nuk figuron me dalje nga vendi.

Përmes Qendrës së Përbashkët të Kontaktit me Republikën e Bullgarisë, autoritetet kanë kërkuar verifikime nga Policia Kufitare Bullgare, e cila ka bërë të ditur se personi në fjalë nuk ka hyrje të ligjshme të regjistruar në territorin e Bullgarisë. Të dhënat e kontrollit kufitar tregojnë se ajo ka hyrë për herë të fundit në Bullgari në shtator 2025, ndërsa në tetor 2025 është regjistruar dalja e saj nga Bullgaria dhe hyrja në Maqedoni. Megjithatë, MPB bën të ditur se ajo dyshohet se ka hyrë ilegalisht në Bullgari.

Mediat bullgare raportuan se Mihailova është larguar nga Maqedonia dhe ndodhet në Bullgari e shoqëruar nga avokati i saj bullgar, Nikolaj Dimitrov. Në një deklaratë për televizionin bullgar BTV, Mihailova deklaroi se për shkak të përkeqësimit të gjendjes shëndetësore kishte vendosur të kthehej në Bullgari, duke shtuar se ndihet e sigurt atje dhe se në Maqedoninë e Veriut ishte e përndjekur për shkak të prejardhjes së saj bullgare. Avokati i saj refuzoi të tregojë se në cilën pikë kufitare kanë kaluar. Seanca e radhës e gjykimit është caktuar për 9 nëntor.