Kurti: “Prishtina 2030” do të mbahet edhe në qytete të tjera

PRISHTINË — Komiteti Organizativ i Lojërave Mesdhetare ka mbajtur takimin e radhës ku u diskutua për vazhdimin e përgatitjeve, ndërsa kryeministri Albin Kurti bëri të ditur se ngjarja sportive do të zhvillohet edhe në qytete të tjera të vendit, përfshirë Pejën, Gjakovën, Prizrenin, Drenasin dhe Skënderajn, bashkë me komunat e tjera.

Kryetari i Prishtinës, Përparim Rama, javë më parë kishte ngritur shqetësimin se Kosova mund ta humbë të drejtën e organizimit të këtyre Lojërave për shkak të mospërmbushjes së obligimeve financiare nga Qeveria, por ngjarja po përgatitet sipas planit të paraqitur që në fazën e kandidaturës.

Sipas kryeministrit Albin Kurti, plani i tillë i mundësoi vendit të fitojë të drejtën për organizimin e Lojërave Mesdhetare më 2030, ndërsa shpërndarja e garave dhe përdorimi i objekteve sportive do të përfshihen në versionin e rishikuar të draftit të Masterplanit që është ende duke u shqyrtuar nga autoritetet kompetente.

Në mbledhjen e Komitetit Organizativ të Lojërave Mesdhetare, sipas njoftimeve zyrtare, morën pjesë edhe ministri i Sportit dhe Rinisë, Blerim Gashani, kryetari i Prishtinës, Përparim Rama, si dhe kryetari i Komitetit Olimpik të Kosovës, Ismet Krasniqi, të cilët diskutuan rreth projekteve prioritare për këtë ngjarje të madhe ndërkombëtare.

Kryeministri Kurti tha se investimet janë duke vazhduar në disa prej objekteve sportive ekzistuese, duke përfshirë Qendrën Nacionale të Xhudos në Pejë, palestrën “Sezai Surroi” në Prizren dhe palestrën “Shani Nushi” në Gjakovë, ndërsa puna për realizimin e projekteve të parapara do të vazhdojë me ritëm të shtuar.

Ndër projektet prioritare të paraqitura gjatë takimit veçohen Qendra e Studentëve, e cila është planifikuar të shërbejë si Fshat i Sportistëve apo Fshat i Atletëve, Pallati i Rinisë dhe Sportit në Prishtinë, Qendra Akuatike dhe Qendra Nacionale e Tenisit, të cilat kërkojnë angazhim shtesë.

Një prej çështjeve kryesore për përmbushjen e kushteve ndërkombëtare mbetet edhe Stadiumi Nacional, për të cilin pjesëmarrësit nënvizuan se duhet të ketë kapacitet prej së paku 20 mijë ulësesh, ndërsa për ceremonitë e hapjes dhe mbylljes po shqyrtohet mundësia e shfrytëzimit të stadiumit “Fadil Vokrri” me kapacitet të shtuar.

Para se të merret një vendim përfundimtar për stadiumin, sipas diskutimeve në mbledhje, do të shqyrtohen kërkesat organizative dhe koha që nevojitet për përgatitjen e tij, ndërsa anëtarët e Komitetit shprehën përkushtimin e tyre për mbarëvajtjen e këtij organizimi.

U vendos gjithashtu që Komiteti Organizativ i Lojërave Mesdhetare të paraqitet me qëndrim të përbashkët në takimin e ardhshëm me Komitetin Ndërkombëtar të Lojërave Mesdhetare, ku do të prezantohen hapat e mëtejmë të përgatitjeve dhe synimi që ngjarja të shërbejë për zhvillimin e infrastrukturës dhe promovimin e Kosovës.