Prokuroria serbe rihap rastin e Milan Radoiçiqit për Banjskën

Nën mbikëqyrjen e Komisionit të Prokurorisë së Lartë Publike të Serbisë dhe me udhëzim të kryeprokurores Zagorka Dolovac, po riqyhtohet rasti i biznesmenit Milan Radoiçiq, i dyshuar për organizimin e sulmit në veri të Kosovës. Vëmendje e veçantë po u kushtohet rrethanave se pse atij nuk iu caktua masa e paraburgimit pas marrjes në pyetje në Prokurorinë e Lartë Publike në Beograd.

Sulmi i armatosur në Banjskë ndodhi më 24 shtator 2023, ku u vra polici i Kosovës, Afrim Bunjaku, ndërsa gjatë shkëmbimit të zjarrit u vranë edhe tre pjesëtarë të grupit të armatosur: Stefan Nedeljkoviq, Bojan Mijailoviq dhe Igor Milenkoviq. Pas ngjarjeve, Radoiçiqi mori përgjegjësinë për organizimin e grupit dhe më pas u paraqit vullnetarisht për t'u marrë në pyetje.

Sipas informacioneve të portalit nova.rs, një nga arsyet e përmendura për moscaktimin e paraburgimit ishte se prokurori i atëhershëm, Nikola Panteliq, kishte paraqitur vetëm një rrethanë në kërkesën e tij, atë të rrezikut të arratisjes, shkruan Telegraf. Kjo rrethanë u konsiderua e pabazuar pasi Radoiçiqi ishte dorëzuar vetë, ndërsa prokurori Panteliq ndërkohë është avancuar në pozitën e shefit të Prokurorisë së Lartë Publike në Pançevë. Pas marrjes në pyetje, prokurori kishte kërkuar paraburgim deri në 30 ditë, duke theksuar se ai herë pas here qëndronte jashtë vendbanimit për më shumë se 90 ditë pa e raportuar. Megjithatë, gjyqtarja e refuzoi kërkesën, duke vlerësuar se lidhjet me Beogradin, paraqitja vullnetare dhe dorëzimi i pasaportës ishin të mjaftueshme për të garantuar praninë e tij. Në vend të paraburgimit, atij iu ndalua largimi nga Serbia pa miratimin e gjykatës, iu konfiskua përkohësisht pasaporta, iu caktua detyrimi i paraqitjes në polici dhe iu ndalua udhëtimi drejt Kosovës.

Komisioni pritet të shqyrtojë arsyet pse prokurori Panteliq nuk iu referua tri rrethanave të tjera që mund të justifikonin paraburgimin: rrezikut të përsëritjes së veprës penale, ndikimit te dëshmitarët dhe shqetësimit të opinionit publik. Kryeprokurorja Zagorka Dolovac kishte nxjerrë një udhëzim të detyrueshëm për të gjitha 87 prokuroritë në Serbi që anëtarëve të komisionit t'u mundësohet qasja në çdo lëndë, ku moszbatimi përbën shkelje disiplinore. Ndërkohë, Radoiçiqi vazhdon të jetë i lirë në Serbi, ndërsa disa serbë të përfshirë në rast janë dënuar në Kosovë me vite të gjata burgimi dhe dy prej tyre me burgim të përjetshëm.

Përmes avokatit të tij, Goran Petronijeviq, Radoiçiqi kishte deklaruar se më 24 shtator kishte shkuar në veri të Kosovës për të inkurajuar popullin serb në rezistencën ndaj Qeverisë së Albin Kurtit dhe për të realizuar, siç ishte shprehur, ëndrrën për lirinë e popullit serb, duke pretenduar se Beogradi nuk kishte pasur dijeni.