Torino, arrestohen dy shqiptarë me kokainë dhe para

Policia italiane ka arrestuar dy shtetas shqiptarë të moshës 42 dhe 27 vjeç, pasi në automjetin e tyre u gjetën pesë blloqe kokaine me një peshë totale prej 5.4 kilogramësh. Ngjarja ka ndodhur të premten e kaluar në Torino, kur efektivët e Skuadrës Fluturuese ndaluan makinën që po lëvizte me shpejtësi të lartë dhe po injoronte semaforët në Via De Sanctis.

Gjatë kontrollit të detajuar, lënda narkotike u zbulua e fshehur në një ndarje të posaçme poshtë hapësirës së dorezave. Përveç sasisë së kokainës, efektivët sekuestruan edhe mbi 10 mijë euro para të gatshme. Pas përfundimit të operacionit, dy të dyshuarit u arrestuan, ndërsa autoritetet italiane po vazhdojnë procedurat hetimore për rastin.