Ilir Shaqiri nderohet në Itali me Çmimin Mesdhetar të Paqes
Artisti shqiptar është mes pesë personaliteteve që do të marrin këtë vlerësim më 11 gusht në festivalin ndërkombëtar Morea.
CERVICATI — Artisti dhe shkrimtari shqiptar, Ilir Shaqiri, do të nderohet më 11 gusht 2026 në Cervicati të Italisë me Çmimin Mesdhetar të Paqes. Ky vlerësim ndërkombëtar ndahet në kuadër të edicionit të sivjetmë të çmimit Morea, i cili ka si temë qendrore diversitetin kulturor për dialog dhe zhvillim.
Në këtë ceremoni do të nderohen pesë personalitete nga mjedisi arbëresh dhe shqiptar që kanë dhënë kontribut të çmuar në art e kulturë. Çmimin do ta dorëzojë Enrico Marchianò, president i Klubit për UNESCO-n në Cosenza. Krahas Shaqirit, laureatë të tjerë janë piktorja Besa Dauti dhe këngëtarja Antonella Pelilli.
Përzgjedhja e personaliteteve nga fusha të ndryshme synon të nxjerrë në pah pasurinë e trashëgimisë arbëreshe që ka mbijetuar ndër shekuj. Përveç artistëve, vlerësime do të marrin edhe kryetari i Cervicatit, Gioberto Filice, si dhe ai i Vaccarizzo Albanese-s, Antonio Pomillo, duke theksuar bashkëpunimin ndërinstitucional.
Burim: Telegrafi
— Redaksia ZHURMA
