Enver Hoxhaj mbërrin në Hagë në mbështetje të ish-krerëve të UÇK-së

Deputeti i Partisë Demokratike të Kosovës dhe ish-ministri i Jashtëm, Enver Hoxhaj, ka shkuar në Hagë për shkak të zhvillimeve që priten në procesin ndaj ish-krerëve të Ushtrisë Çlirimtare të Kosovës. Përmes një postimi në rrjetin social Facebook, ai ka ndarë një imazh nga aeroporti holandez, ku shfaqet në shoqërinë e deputetit Mërgim Lushtaku dhe Nait Hasani, të cilët gjithashtu kanë udhëtuar atje për t'i dalë në krah ish-udhëheqësve të UÇK-së. Gjatë këtij udhëtimi, ai ka theksuar se ndodhet atje me besim të plotë te drejtësia dhe te rikthimi i çlirimtarëve. Gjatë veprimtarisë së tij politike, ai ka shfaqur vazhdimisht qëndrime kritike ndaj mënyrës se si po zhvillohet ky proces gjyqësor, duke kërkuar lirimin e Hashim Thaçit, Kadri Veselit, Rexhep Selimit dhe Jakup Krasniqit.