Dua Lipa vendos flamingot e protestave në hyrje të 'Sunny Hill'
Simboli i protestave mjedisore të Shqipërisë shfaqet në edicionin e sivjetmë të festivalit në Prishtinë, që pritet të mbledhë mbi 100 mijë pjesëmarrës.
PRISHTINË — Këngëtarja e njohur Dua Lipa ka vendosur flamingot, simbolin e protestave mjedisore në Shqipëri, në hyrje të festivalit “Sunny Hill” në Prishtinë. Ky hap vjen si një shenjë e drejtpërdrejtë e mbështetjes së artistes për kauzat që lidhen me mbrojtjen e natyrës dhe protestat që po zhvillohen aktualisht.
Më herët, ylli ndërkombëtar u shpreh në përkrahje të këtyre protestave gjatë një bashkëbisedimi në podkastin e shkrimtares Lea Ypi. Kjo intervistë pati një jehonë të madhe në mediat ndërkombëtare, ndërsa tani mesazhi po përcillet drejtpërdrejt te publiku i gjerë përmes instalacionit të flamingove të vendosur në hyrje të hapësirës së festivalit.
Ky edicion i festivalit, i cili zgjat nga data 31 korrik deri më 2 gusht, pritet të tërheqë më shumë se 100,000 pjesëmarrës nga pothuajse 60 vende të ndryshme të botës. Ngjarja, e themeluar në vitin 2018 nga Dukagjin Lipa dhe e promovuar nga vajza e tij Dua, po rritet vazhdimisht nga viti në vit.
Në listën e artistëve të huaj që do të performojnë në këtë edicion bëjnë pjesë emra të njohur si Katy Perry, Martin Garrix, Lewis Capaldi, Seth Troxler, PAWSA, Carlita, si dhe Adam Port e Rampa nga Keinemusik. Pjesëmarrja e tyre pritet të tërheqë vëmendje të shtuar ndaj kauzës.
Burim: BalkanWeb
— Redaksia ZHURMA