Bennett: Dorëheqja e Gazmend Hoxhës ishte e panevojshme

Ish-drejtori i Misionit për Edukim dhe Zhvillim Policor, Steve Bennett, ka deklaruar se largimi i Gazmend Hoxhës nga pozita e drejtorit të Policisë së Kosovës ishte veprim i panevojshëm. Ky reagim vjen pas dorëheqjes së Hoxhës e cila pasoi vrasjen e Arlinda Zekajt, ngjarje kjo që kishte tronditur opinionin publik dhe kishte hapur debate mbi përgjegjësinë e institucioneve të rendit.

Bennett ka theksuar se rasti kërkon llogaridhënie të plotë, por ka paralajmëruar se largimi i drejtorit të përgjithshëm rrezikon që përgjegjësia simbolike të zëvendësojë hetimin e vërtetë të dështimeve institucionale. Sipas tij, çështjet që lidhen me praktikat organizative dhe kulturën institucionale nuk mund të zgjidhen vetëm përmes dorëheqjes së udhëheqësit të Policisë. «Llogaridhënia duhet të jetë proporcionale me përgjegjësinë e provuar dhe jo të përcaktohet thjesht nga pozita apo niveli hierarkik i zyrës që dikush mban», ka shkruar ai.

Më tej, ai ka kërkuar një hetim të pavarur dhe gjithëpërfshirës për mënyrën se si u trajtua rasti, duke vënë theksin te zbatimi i urdhrave për mbrojtje dhe vlerësimi i rrezikut. Sipas tij, besimi i qytetarëve nuk rikthehet përmes dorëheqjeve, por përmes identifikimit të qartë të dështimeve dhe masave konkrete për mbrojtjen e personave të cenueshëm.