Jep dorëheqje drejtori i Policisë së Kosovës Gazmend Hoxha

Kryeministri Albin Kurti ka liruar nga detyra Drejtorin e Përgjithshëm të Policisë së Kosovës, Gazmend Hoxha, pasi ky i fundit ka dhënë dorëheqje më 30 tetor 2026. Në vend të tij, me propozim të ministrit të Punëve të Brendshme Xhelal Sveçla, ushtrues detyre është caktuar Fehmi Hoti, pas vrasjes së Arlinda Zekajt më 25 tetor në Vitomiricë të Pejës.

Siç raportoi Zhurma më 27 tetor 2026, Komisioni për Çështje të Sigurisë pas një përplasjeje kishte refuzuar kërkesën e deputetes Ganimete Musliu që drejtori i Policisë të raportonte javën e ardhshme, duke vendosur që dëgjimi i tij për këtë rast të mbahej pas katër javësh. Refuzohet kërkesa e Musliut që Gazmend Hoxha të raportojë javën e ardhshme.

Zyra e Kryeministrit dhe Qeveria e Kosovës kanë njoftuar se Kurti e ka miratuar kërkesën e Hoxhës, ndërsa kanë shprehur vlerësimin për punën dhe angazhimin e tij gjatë kohës sa udhëhoqi institucionin. Largimi i kreut të policisë vjen në një periudhë me reagime të shumta publike e protesta, si dhe pas një vargu masash ndëshkuese në institucionet e rendit e të drejtësisë. Një ditë para dorëheqjes së tij, Policia e Kosovës suspendoi 11 zyrtarë policorë pas rekomandimit nga Inspektorati Policor i Kosovës. Mes të suspenduarve janë ushtruesi i detyrës së drejtorit rajonal në Pejë, shefi i Hetimeve Rajonale, komandanti dhe zëvendëskomandanti i Stacionit Policor në Pejë, katër hetues dhe zyrtarë të tjerë udhëheqës. Po ashtu, Këshilli Prokurorial i Kosovës vendosi më 29 tetor suspendimin e kryeprokurores së Prokurorisë Themelore në Pejë, Lumturije Vuçetaj, si dhe të prokurores së rastit, Arlinda Nallbani-Gacaferri, e cila shërbeje edhe si koordinatore për rastet e dhunës në familje.

Kuvendi i Kosovës ka formuar një Komision hetimor parlamentar, i cili do të shqyrtojë hollësisht të gjitha veprimet dhe mosveprimet e institucioneve përgjegjëse rreth këtij rasti.

Sipas njoftimit zyrtar nga Zyra e Kryeministrit, vendimi për lirimin nga detyra u mor pasi kryeministri «sot pranoi nga z. Gazmend Hoxha kërkesën për dorëheqje».