Refuzohet kërkesa e Musliut që Gazmend Hoxha të raportojë javën e ardhshme

Komisioni Parlamentar për Çështje të Sigurisë dhe të Mbrojtjes ka refuzuar kërkesën e deputetes së Partisë Demokratike të Kosovës, Ganimete Musliu, që drejtori i Policisë së Kosovës, Gazmend Hoxha, të ftohet javën e ardhshme për të raportuar lidhur me vrasjen e Arlinda Zekajt në Pejë. Kryetari i komisionit, Mefail Bajqinovci, bëri të ditur se drejtori i Policisë do të raportojë pas katër javësh.

Siç raportoi Zhurma më 27 tetor 2026, ngjarja tronditëse riktheu vëmendjen te reagimi i autoriteteve pas vonesave të policisë në trajtimin e denoncimeve dhe procedurave hetimore ndaj personave të përfshirë në kanosje.

Gjatë mbledhjes së komisionit, Ganimete Musliu deklaroi se dëgjimi i Policisë së Kosovës është i domosdoshëm për të qartësuar rrethanat dhe veprimet institucionale, pasi Zekaj pak orë para vrasjes ishte kthyer në shtëpi nga Policia ku kishte denoncuar ish-bashkëshortin për kanosje. Nga ana tjetër, Mefail Bajqinovci deklaroi se për këtë rast do të ketë edhe një komision hetimor që do të zbardhë përgjegjësitë institucionale dhe do të verifikojë nëse ka pasur neglizhencë. Ai po ashtu përmendi se në kampin e Vrellës janë realizuar intervista dhe se nuk ka pasur asnjë rrezik. Ndërkaq, deputetja e Lëvizjes Vetëvendosje, Shqipe Selimi, theksoi se rasti i Arlinda Zekajt dhe rastet e tjera të dhunës në familje kërkojnë trajtim serioz nga të gjitha institucionet përgjegjëse.

Drejtori i Policisë së Kosovës, Gazmend Hoxha, pritet të raportojë para deputetëve pas katër javësh, ndërsa punën për verifikimin e përgjegjësive institucionale do ta vazhdojë komisioni hetimor.

Musliu tha në mbledhje: «Unë kërkoj që javën tjetër sot një javë të ftohet drejtori i policisë së Kosovës dhe të raportoj për vrasjen. Pa drejtuar gishtin nuk po tentoj ti kë faj unë po dua ta mbroj policinë. Ne mundemi me thirr edhe Inspektoratin Policorë pastaj. Propozimi im është shumë i qarte, ju caktojeni».

Bajqinovci u shpreh para komisionit: «Do të ketë komision hetimor dhe ai komision do të kryej punën e vet. Ai komision do të zbardhë të vërtetën se cili institucion e ka neglizhuar punën nëse ka pasur ne rastin e të ndjerës. Për çështjen në kampin e Vrelles, nuk është rrezikua asgjë aty dhe se në atë pjesë të kampit janë realizuar intervista të ndryshme dhe se nuk ka pasur asnjë rrezik. Unë besoj se drejtori i policisë do të raportoj muajin e ardhshëm».