Altini beson se vendimi i Gjykatës Speciale do të jetë lirues

Në prag të shpalljes së verdiktit nga Dhomat e Specializuara të Kosovës, Altini, djali i Jakup Krasniqit, ka deklaruar se ka besim të plotë në një vendim lirues. Gjatë hyrjes në objektin e këtij institucioni gjyqësor, ai theksoi se personalitetet si Hashim Thaçi, Kadri Veseli, Rexhep Selimi dhe vetë Jakup Krasniqi do t'u kthehen lirshëm familjeve të tyre në Kosovë pas përfundimit të procesit në Hagë.

Sipas tij, pavarësisht çdo vendimi që mund të merret, populli shqiptar dhe ai vetë mbeten krenarë për luftën dhe veprimtarinë e deritanishme të Ushtrisë Çlirimtare të Kosovës. Ai shtoi se mbështetja masive popullore për çlirimtarët përbën një forcë të madhe dhe shprehu dëshirën që qytetarët të vazhdojnë të vlerësojnë lart kontributin e tyre historik.