Kush ishte Aleks Buda?

— 7 korrik 1993, në Tiranë, akademik Aleks Buda u nda nga jeta, duke lënë pas një trashëgimi të pasur që e vendos ndër figurat më të ndritura të historiografisë shqiptare dhe të jetës akademike të vendit. Ai lindi në vitin 1911, në një familje fisnike dhe patriote të Elbasanit. I ati, Dhimitër Buda, farmacist i njohur, kontribuoi si delegat në Kongresin e Manastirit dhe si një nga financuesit e Shkollës Normale të Elbasanit, duke lënë gjurmë të rëndësishme në historinë e arsimit shqiptar.

Akademik Buda dha një kontribut të çmuar në organizimin e punës kërkimore­shkencore. Ai ishte një ndër organizatorët e Institutit të Shkencave, ku themeloi sektorin e historisë dhe sociologjisë, duke kontribuar në ngritjen e sektorëve të arkeologjisë, historisë së lashtë, mesjetës, kohës së re, artit mesjetar dhe etnografisë.

Me formimin e Institutit të Historisë dhe të Gjuhësisë më 1955, Buda hodhi bazat e medievistikës shqiptare, duke e vendosur këtë fushë në themelet e saj shkencore. Me ngritjen e Universitetit të Tiranës, ai u bë një ndër themeluesit e katedrës së historisë së Shqipërisë dhe të kursit të historisë së Shqipërisë në Fakultetin e Historisë dhe të Filologjisë.

Punoi me përkushtim për përgatitjen e historianëve të rinj, sidomos në fushën e historisë mesjetare, duke formuar breza të tërë studiuesish. Akademia e Shkencave e Shqipërisë e kujton me nderin akademikun Buda, duke e vlerësuar si një simbol të përkushtimit dhe vizionit europian për zhvillimin e shkencës dhe kulturës kombëtare.

— Burim: Dielli, https://gazetadielli.com/kujtojme-sot-ne-pervjetorin-e-ndarjes-nga-jeta-akademikun-aleks-buda/ — Redaksia ZHURMA