NATO rikonfirmon angazhimin ndaj KFOR-it dhe stabilitetit rajonal
Gjeneralmajori Roberto Vergori ka marrë drejtimin e misionit të KFOR-it nga Özkan Ulutaş, në një ceremoni të mbajtur në Prishtinë.
Redaksia ZHURMA · · 1 min lexim
Situata e sigurisë në Kosovë është cilësuar nga Aleanca Veriatlantike si e qëndrueshme në përgjithësi dhe në përmirësim e sipër. Në njoftimin për ceremoninë e ndërrimit të komandës së misionit në Prishtinë, u tha se procesi i optimizimit të trupave përfshin rregullim gradual dhe të kalibruar të pozicionimit gjatë vitit në vijim.
Komandën e KFOR-it e mori gjeneralmajori Roberto Vergori nga Italia, i cili pasoi gjeneralmajorin Özkan Ulutaş nga Turqia. Ngjarja u drejtua nga admirali George M. Wikoff, i cili vlerësoi punën e komandantit paraprak me komunitetet dhe Policinë, ndërsa të pranishëm ishin përfaqësues të institucioneve dhe të bashkësisë ndërkombëtare.
«Ballkani Perëndimor është një rajon me rëndësi strategjike për NATO-n. Angazhimi i Aleancës për stabilitetin rajonal është i palëkundur, dhe KFOR-i vazhdon të kontribuojë në sigurinë e qëndrueshme për të gjithë njerëzit dhe komunitetet që jetojnë në Kosovë, si dhe në lirinë e lëvizjes», thuhet në komunikatë.
