Vdesh aktori turk Kadir İnanır në moshën 77-vjeçare
Si u bë personazhi i Iljazit nga filmi 'Shamikuqja' një nga figurat më të dashura të kinemasë turke dhe shqiptare?
ISTANBULL — Aktori i njohur turk Kadir İnanır është ndarë nga jeta të premten në moshën 77-vjeçare. Ai ndërroi jetë pas disa javësh qëndrim në kujdes intensiv, ku po trajtohej për pneumoni dhe komplikacione të rënda shëndetësore.
Për publikun shqiptar, İnanır do të mbetet i paharruar për interpretimin e rolit të Iljazit në filmin klasik „Shamikuqja“ (Selvi Boylum Al Yazmalım). Ky film, i shfaqur në Shqipëri gjatë viteve ’80, u kthye në një histori dashurie ikonike krah aktores Türkan Şoray.
Gjatë një karriere që zgjati mbi pesë dekada, ai interpretoi në afro 200 filma dhe bashkëpunoi me regjisorët më të njohur të Turqisë. Përveç ekranit të madh, İnanır ishte aktiv edhe në televizion si aktor, prezantues dhe regjisor, duke u shënuar si figurë e epokës së artë Yeşilçam.
Vitet e fundit, aktori u përball me probleme të shumta shëndetësore, përfshirë emboli cerebrale dhe goditje në tru. Paraqitja e tij e fundit në ekran daton në vitin 2019, duke mbyllur një trashëgimi artistike që mbetet pjesë e historisë së kinemasë.
Burim: Gazeta Tema
— Redaksia ZHURMA
