UNESCO jep afat 5-vjeçar Shqipërisë dhe Maqedonisë së Veriut për Ohërin

PARIS — Komiteti i Trashëgimisë Botërore i UNESCO-s vendosi të japë Shqipërisë dhe Maqedonisë së Veriut një afat shtesë pesëvjeçar për të zbatuar masat e kërkuara për mbrojtjen e Rajonit Natyror dhe Kulturor të Ohrit, duke shmangur për momentin përfshirjen e tij në Listën e Trashëgimisë Botërore në Rrezik.

Organizata thekson se degradimi i vlerave të jashtëzakonshme universale të zonës nuk është ndalur. Vendimi u mor në sesionin e 48-të të Komitetit, pas shqyrtimit të raportit mbi gjendjen e ruajtjes së rajonit.

Inxhinieri dhe ambientalisti Arian Merolli kritikoi entuziazmin e zëvendëskryeministrit pas vendimit. “Mua kjo më habiti, sepse do të ishte më mirë të ishte futur në atë listë. Kjo do të rriste presionin e UNESCO-s mbi qeverinë për masa konkrete”, thotë Merolli.

Sipas tij, afati pesëvjeçar rrezikon të mos sjellë rezultat nëse mungon vullneti politik. “Pas pesë vitesh kjo qeveri mund të mos jetë më në pushtet. Shqetësimi im është nëse ata e dinë çfarë duhet të bëjnë”, vijon ai.

Maqedonia e Veriut ka avancuar duke kaluar strategjinë në mbledhje qeverie dhe duke krijuar grup ndërinstitucional, ndërsa Shqipëria mbetet pas. Merolli kërkon plan zbatimi me afate dhe buxhete të përcaktuara: “Pa fonda dhe përgjegjës të caktuar, strategjia mbetet vetëm një dokument”.

UNESCO shpreh keqardhje për mungesë përparimi në rishikimin e projektit pesëkatësh në Tushemisht, pezullimin e “Drilon–Tushemisht Waterscape”, rishikimin e Planit të Pogradecit dhe ndalimin e rrugës bypass. Këto projekte duhet të pezullohen derisa të bëhen vlerësimet e ndikimit.

Tushemishti është dëmtuar rëndë. Shqetësime mbeten edhe për rrjetin e ujërave të zeza dhe menaxhimin e peshkimit — askush nuk di saktësisht sa peshk zihet, pasi mungon regjistrimi. Liqeni i Ohrit, me 358 km² dhe thellësi 288 metra, është një nga liqenet më të vjetra dhe më të thella në Evropë me biodiversitet unik.

Burim: Citizens Channel
— Redaksia ZHURMA