Koha Javore: Seminari i vitit 1981 në Ulqin ishte kurth kundër arsimtarëve shqiptarë

Seminari i mbajtur më 26 dhe 27 shtator 1981 në Ulqin për punëtorët e arsimit, albanologët dhe historianët nga territori i komunës së Ulqinit dhe Tivarit, ka shërbyer si një kurth i planifikuar ndaj arsimtarëve shqiptarë me qëllim dobësimin e kuadrit arsimor dhe ndjesisë kombëtare në ato troje, sipas dokumenteve arkivore të publikuara nga Koha Javore.

Aktiviteti arsimor ishte paraparë zyrtarisht për hartimin e planeve të reja mësimore dhe organizimin e procesit edukativo-arsimor. Megjithatë, mënyra e organizimit, kushtet hapësinore të papërshtatshme dhe sjelljet e organizatorëve e pjesëtarëve treguan se takimi devijoi nga qëllimet e deklaruara mësimore, duke u kthyer në një mjet vëzhgimi politik ndaj mësimdhënësve shqiptarë.

Organizata Bazë e Lidhjes së Komunistëve (OBLK) e Qendrës Shkollore në Ulqin, gjatë një mbledhjeje të mbajtur më 19 nëntor 1981 për analizën dhe vlerësimin politik të seminarit, dënoi organizatorët sepse nuk kishin reaguar me kohë për të parandaluar krijimin e një atmosfere të padëshiruar, sipas përfundimeve të mbledhjes së OTHLK-së të Gjimnazit. OBLK konstatoi se hapësira ku u mbajt seminari ishte e papërshtatshme dhe e vogël sepse organizatorët nuk ishin lajmëruar me kohë për numrin e pjesëmarrësve. Në të njëjtën mbledhje u kërkua përgjegjësi për mospjesëmarrjen e disa arsimtarëve që ishin anëtarë të Lidhjes së Komunistëve të Jugosllavisë (LKJ).

Shërbimi i Sigurimit Shtetëror, si vazhdimësi e UDB-së, ishte ngarkuar me detyrë para fillimit të seminarit që të përcjellë dhe të vërtetojë çdo zhvillim në atë takim, njofton dokumentacioni arkivor i kohës. Sigurimi Shtetëror i paraqiti më pas një informatë Komitetit për Mbrojtjen e Përgjithshme Popullore dhe Vetëmbrojtjen Shoqërore, ku kishte analizuar veprimtarinë e arsimtarëve që ndodheshin nën përcjellje të vazhdueshme.

Në informatën e dërguar Komitetit për Mbrojtjen e Përgjithshme Popullore dhe Vetëmbrojtjen Shoqërore, Shërbimi i Sigurimit Shtetëror ka theksuar se «seminari i përmendur ishte vetëm një rast për vëzhgimin dhe vlerësimin e aktiviteteve negative të një numri arsimtarësh, sepse një sjellje e tillë e tyre nuk shprehet për herë të parë.» Dokumenti i sigurimit shton se kishte ekzistuar edhe më parë arsye e fortë që disa persona të ishin objekt diskutimi pasi gjendeshin nën përcjellje, ndërsa organizimi i seminarit thjesht e ka shpejtuar procesin.