Nënshkruhet memorandumi për zgjerimin e varrezave islame në Ulqin

Komuna e Ulqinit dhe Bashkësia Islame e Ulqinit kanë lidhur një memorandum bashkëpunimi dhe mbështetje financiare për blerjen e tokës që do t'i shërbejë zgjerimit të varrezave islame «Sallaku» në lagjen Pinjesh. Dokumenti është firmosur nga kryetari i komunës, Genci Nimanbegu, dhe kryetari i Mexhlisit të Bashkësisë Islame, Blerim Bajraktari.

Sipas marrëveshjes, vlera e përgjithshme e blerjes së tokës kap shifrën prej 101.250,00 eurosh, shumë të cilën Komuna e Ulqinit do ta mbulojë në tërësi përmes pagesave në dy këste. Ky investim pritet të krijojë rreth 600 vende të reja për varrim, duke mbuluar nevojat e besimtarëve për një periudhë prej 10 deri në 15 vjet dhe duke i dhënë zgjidhje mungesës së hapësirave. Nimanbegu theksoi se vendimi erdhi pas kërkesës së paraqitur nga Bashkësia Islame gjatë verës.