Zyra e Kryeministrit publikon vlerësimin për zhvillimin
Një dokument zyrtar evidenton ngecjet dhe sfidat në sektorët kyçë të shtetit përgjatë periudhës afatmesme.
Redaksia ZHURMA · · 2 min lexim
Një vlerësim afatmesëm i hartuar nga Zyra për Planifikim Strategjik në kuadër të Zyrës së Kryeministrit nxjerr në pah se reformat e parapara në Strategjinë Kombëtare për Zhvillim 2030 kanë shënuar vonesa dhe ngecje në disa sektorë kyçë. Dokumenti thekson se shkalla mesatare e përfundimit të aktiviteteve lëvizte ndërmjet 25 për qind dhe 50 për qind, me një minimum prej 18 për qind dhe një maksimum rreth 58 për qind, ndërsa si shkaqe përmenden pasojat nga moskonstituimi i institucioneve pas zgjedhjeve të vitit 2025, ndërprerja e programeve të USAID-it dhe masat e vendosura nga Bashkimi Evropian në vitin 2023.
Sipas dokumentit, lidhja e planeve strategjike me buxhetin ka shënuar rënie nga 75 për qind në 38.5 për qind gjatë vitit 2024, ndërkohë që rritja reale e Bruto Produktit Vendor u ngadalësua nga 4.6 për qind në vitin 2024 në 3.6 për qind në vitin 2025. Inflacioni mesatar u rrit në 3.9 për qind në vitin 2025, kurse deri në shtator inflacioni vjetor mesatar për vitin 2026 arriti në 6.7 për qind, ndonëse është ruajtur stabiliteti makroekonomik.
Ngecje janë shënuar gjithashtu në administratë publike, ku numri i komunave që plotësuan kriteret për Grantin e Performancës Komunale ra nga 14 në 5, si dhe në drejtësi ku u rrit numri i lëndëve të pazgjidhura në çështjet civile dhe administrative. Ndërkaq, ndarjet buxhetore për mbrojtje dhe siguri arritën synimin e përcaktuar.
