Tubim në Cyrih me moton “Jo në emrin tim!” kundër vendimeve të Hagës

Një organizim i ri i ndërmarrë nga të rinjtë shqiptarë në Zvicër parasheh mbajtjen e një tubimi kundër vendimeve të Gjykatës Speciale në Hagë ndaj ish-krerëve të UÇK-së. Ky manifestim do të zhvillohet të shtunën, më 19 shtator, duke filluar nga ora 15:00, në sheshin Helvetiaplatz të Cyrihut.

Pjesëmarrësit janë ftuar të mblidhen nën thirrjen “Jo në emrin tim!” për të kundërshtuar në mënyrë paqësore atë që organizatorët e cilësojnë si padrejtësi ndaj personaliteteve të larta të luftës. Ndërkohë, autoritetet policore vendase kanë dhënë lejen zyrtare për zhvillimin e këtij tubimi, ndërsa thirrjet drejtuar bashkatdhetarëve kërkojnë prani me simbole kombëtare, emblema të UÇK-së dhe veshje kuq e zi.