Trump propozon Mikhail Bogachek për ambasador të ri në Kosovë

Presidenti i Shteteve të Bashkuara të Amerikës, Donald Trump, ka propozuar Mikhail Bogachek, nga Florida, për pozitën e Ambasadorit të Jashtëzakonshëm dhe Fuqiplotë në Republikën e Kosovës. Sipas njoftimit të publikuar nga Shtëpia e Bardhë, emri i tij është përfshirë në listën e nominimeve presidenciale dhe i është dërguar Senatit amerikan për shqyrtim dhe konfirmim.

Kosovës i është dashur të funksionojë për gati dy vjet pa një ambasador të emëruar të Shteteve të Bashkuara të Amerikës, pasi diplomatit të fundit, Jeffrey Hovenier, i përfundoi misioni. Hovenier mori detyrën në muajin janar të vitit 2022 dhe shërbeu në këtë pozitë deri në përfundim të mandatit të tij, ndërsa misioni diplomatik në Prishtinë u drejtua nga të ngarkuar me punë pas largimit të tij në fund të dhjetorit të vitit 2024.

Sipas të dhënave nga biografia e publikuar, Mikhail Bogachek ka më shumë se 25 vjet përvojë në udhëheqjen e proceseve të inovacionit, shëndetësisë, teknologjisë dhe qeverisjes. Ai aktualisht shërben si drejtor ekzekutiv i Organizatës së Shteteve Amerikane, ku sipas njoftimit mbikëqyr administratën, financat, burimet njerëzore, prokurimin dhe shërbimet e teknologjisë informative, ndërsa më parë ka mbajtur detyrën e drejtorit të operacioneve në kompaninë VativoRx.

Nën drejtimin e tij në VativoRx, kompania u zgjerua në menaxhimin e rimbursimeve dhe administrimin e përfitimeve farmaceutike, duke ndikuar te më shumë se 1.4 milion njerëz në të gjithë Shtetet e Bashkuara, siç ceket në biografinë e tij zyrtare. Për më tepër, ai ka themeluar kompaninë Cooperton për sigurinë kibernetike dhe menaxhimin e krizave, e cila mbron mbi 60 për qind të spitaleve në Porto Riko, si dhe kompaninë PharmaLife që krijoi sistemin e parë elektronik të të dhënave shëndetësore në Xhorxhia.

Në rrafshin e arsimit dhe veprimtarisë akademike, Bogachek ka diplomuar në inxhinieri industriale dhe të sistemeve në Institutin e Teknologjisë të Xhorxhias, ka fituar doktoraturën në bioinxhinieri dhe ka përfunduar programin OPM në Shkollën e Biznesit të Harvardit në vitin 2026. Ai është autor i mbi 20 publikimeve shkencore dhe flet rrjedhshëm rusisht, ukrainisht dhe hebraisht, ndërsa është zgjedhur edhe anëtar i bordit drejtues të Koalicionit Republikan Hebre.

Procesi i emërimit të tij kërkon që kandidatura të kalojë nëpër fazën e konfirmimit nga Senati amerikan përpara se të marrë zyrtarisht detyrën e re diplomatike.

Sipas njoftimit të Shtëpisë së Bardhë, deklarohet zyrtarisht: «Mikhail Bogachek, nga Florida, të jetë Ambasador i Jashtëzakonshëm dhe Fuqiplotë i Shteteve të Bashkuara të Amerikës në Republikën e Kosovës».