Kurti merr pjesë në darkën e shtruar nga Macron në Paris

Kryeministri i Kosovës, Albin Kurti, i shoqëruar nga bashkëshortja e tij Rita Augestad-Knudsen, ka marrë pjesë në darkën zyrtare të shtruar në Pallatin Élysée në Paris nga presidenti i Francës, Emmanuel Macron, dhe Zonja e Parë, Brigitte Macron, për krerët dhe personalitetet pjesëmarrëse në Forumin e Paqes.

Kjo ngjarje zyrtare shënoi përmbylljen e vizitës së kryeministrit Kurti në kryeqytetin francez, e cila ka nisur më 7 nëntor. Gjatë qëndrimit në Paris në kuadër të Forumit të Paqes, udhëheqësi i qeverisë së Kosovës ka zhvilluar një sërë takimesh politike, institucionale dhe akademike, si dhe ka qenë pjesëmarrës në panele diskutimi ndërkombëtare.

Sipas njoftimeve zyrtare, Kurti u takua me presidentin e Senatit të Francës, Gerard Larcher, me të cilin bisedoi për bashkëpunimin dypalësh mes Kosovës dhe Francës, zhvillimin ekonomik, si dhe synimet e Kosovës për anëtarësim në strukturat e Bashkimit Evropian dhe në NATO. Po ashtu, kryeministri zhvilloi një takim me kryetarin e Parisit, Emmanuel Gregoire, ku temë e diskutimit ishte bashkëpunimi në fushën e banimit social e të përballueshëm, si dhe forcimi i lidhjeve kulturore mes dy vendeve.

Përveç takimeve me drejtuesit e institucioneve franceze, Kurti u takua edhe me figura të njohura që kanë kontribuar për Kosovën, përfshirë ish-ministrin francez të Mbrojtjes, Alain Richard, si dhe me përfaqësues nga fusha e kulturës, akademia dhe drejtësia ndërkombëtare. Në këto bashkëbisedime u trajtuan çështjet e sigurisë, zhvillimit demokratik e ekonomik, si dhe u diskutua për vendimin e 16 shtatorit të Gjykatës Speciale dhe përpjekjet që po bëhen për ndryshimin e tij në shkallën e apelit. Gjithashtu, Kosova u bë pjesë e Deklaratës Politike të Samitit të Fëmijëve, të lansuar gjatë këtij forumi.

Sa i përket pjesëmarrjes në panele, Kurti ishte pjesë e diskutimit “Making Peace Last: Rebuilding Societies After War”, ku prezantoi pikëpamjet e tij mbi demokracinë, arsimin, zhvillimin social-ekonomik dhe rëndësinë e investimeve në projektet e infrastrukturës.

Pas përfundimit të darkës zyrtare të shtruar në kuadër të Forumit të Paqes, Kurti u shpreh publikisht për pjesëmarrjen e tij dhe të bashkëshortes së tij në këtë pritje të nivelit të lartë.

«Bashkë me Ritën ishim të nderuar të marrim pjesë në darkën e shtruar nga Presidenti Emmanuel Macron dhe Zonja e Parë Brigitte Macron, në Pallatin Élysée, në kuadër të Forumit të Paqes në Paris», ka shkruar Kurti në rrjetin social Facebook.