Iva Mihajllova akuzon institucionet e Maqedonisë së Veriut pas arratisjes në Bullgari

Iva Mihajllova nga Koçani, e cila gjendej në gjykim për një aksident trafiku me pasojë vdekjen ku humbi jetën Besim Durmishi, është arratisur në Bullgari dhe kërkohet me fletarrest ndërkombëtar. Gjatë një paraqitjeje në një podcast, ajo ka lëshuar akuza ndaj prokurorisë dhe gjyqësorit të Maqedonisë së Veriut, duke pretenduar se trajtimi ndaj saj kishte ndryshuar për keq pasi ishte deklaruar si bullgare.

Mihajllova ka deklaruar se prokurori i çështjes ishte bullgarofob dhe se i kishte kërkuar para në këmbim të një dënimi me kusht për të shmangur burgun. Ajo gjithashtu ka hedhur përgjegjësinë për aksidentin fatal te punëtorët që po renovonin vilën e ministrit të Punëve të Jashtme, Timço Mucunski, duke pretenduar se ata mbrohen nga një person me pozitë të lartë në shtet. Ndër të tjera, ajo ka akuzuar kryeministrin Hristijan Mickoski për financim të mediave me qëllim përhapjen e propagandës dhe urrejtjes ndaj Bullgarisë, ndërsa ka pohuar se është mbikëqyrur nga persona civilë dhe shërbimet e sigurisë gjatë qëndrimit në Koçan.

Rasti është shndërruar në një kontest politik mes dy shteteve, ndërkohë që Bullgaria e ka trajtuar çështjen si rast diskriminimi për shkak të shtetësisë bullgare të Mihajllovës. Për shkak të fletarrestit ndërkombëtar, ajo ka bërë të ditur se nuk do të kthehet më në Maqedoni të Veriut, teksa mbeten të paqarta rrethanat e kalimit të kufirit.