Muamet Hoxha premton përfundimin e kanalizimit në Zajaz

Punimet për rrjetin e kanalizimit që shtrihet nga Zajazi deri në fshatin Drugovë të Kërçovës nisën në vitin 2022 dhe përfshinin rreth 100 kilometra gjatësi. Megjithatë, projekti u ndërpre në vitin 2024, duke lënë vetëm 17 për qind të punëve të kryera dhe duke lënë banorët pa asnjë njoftim për fatin e mëtutjeshëm. Banorët shprehen se i kanë humbur shpresat për këtë investim, duke e krahasuar me zvarritjen e përhershme të spitalit të Kërçovës.

Sipas ish-kryetarit të Kërçovës, Fatmir Dehari, ndërprerja erdhi pasi kompania nga Azerbajxhani që fitoi tenderin angazhoi kompani vendase për punimet, por banka e tyre në Azerbajxhani falimentoi dhe bllokoi garancinë bankare. Ky projekt kap vlerën e afro 16 milionë eurove dhe financohet nga Bashkimi Evropian. Pavarësisht paqartësive të krijuara prej një viti e gjysmë, ministri i Mjedisit Jetësor dhe Planifikimit Hapësinor, Muamet Hoxha, premton se projekti do të përfundohet, ndonëse nuk ka dhënë ende detaje të hollësishme rreth afateve.