Spitalet e Veriut pa mjekë e pajisje, mijëra pacientë te «Isa Grezda»

GJAKOVË — Gjatë nëntë muajve të parë të vitit, rreth katër mijë pacientë nga veriu i Shqipërisë janë trajtuar në spitalin e përgjithshëm «Isa Grezda» në Gjakovë, për shkak të mungesës së kapaciteteve diagnostikuese dhe mjekëve në spitalet e veriut të Shqipërisë.

Kjo situatë e krijuar nga largësia prej spitaleve të Tiranës, mungesa e infrastrukturës dhe kapacitetet e kufizuara në imazheri, ka nisur që gjatë pandemisë së Covid-19, kur lëvizjet ishin të kufizuara, siç shpjegon drejtori i spitalit Hilmi Shala, ndërsa spitalit të Gjakovës i drejtohen kryesisht banorët e Tropojës dhe Hasit, ndërsa ata të Kukësit shkojnë në Prizren.

Gëzim Cela, i cili udhëton çdo ditë nga Tropoja për të qëndruar pranë së ëmës 80-vjeçare të shtruar në repartin e kardiologjisë pas një problemi në zemër, tregon se spitali i Tropojës e transportoi menjëherë pasi nuk mund të kryenin analizat e nevojshme. Duke u shprehur mirënjohës për punën e mjekëve, ai thekson se «këtu shërbimi është perfekt, jemi shumë të kënaqur».

Gjatë kësaj periudhe nëntëmujore, sipas drejtorit Hilmi Shala, spitali ka ofruar shërbime ambulatore për rreth katër mijë pacientë, ka shtruar 418 persona, ka kryer 64 operacione dhe ka realizuar 390 seanca dialize pa asnjë pagesë, duke deklaruar se «ne kemi shëndetësi falas dhe i kemi hapur dyert për shqiptarët, janë vëllezërit tanë». Ndërkohë, sipas Shala, pala shqiptare nuk ka pranuar një kërkesë të qeverisë së Kosovës që t'u mundësohej falas pacientëve nga Kosova hemodializa në Shqipëri, ku një seancë kushton rreth 12 mijë lekë. Për rastet e trajtimit të specializuar, mjeku i urgjencës shpjegon se pacientët dërgohen në spitalin që e ofron ose kthehen me autoambulancë drejt Shqipërisë, ndërsa në shtator 2026 në kardiologji ishin shtruar shtatë pacientë nga Shqipëria.