Fusha: Fatura e rrymës për bizneset e mia kap 225 mijë euro

PRIZREN — Fatura e energjisë elektrike për muajin tetor ka arritur në 225 mijë euro për të gjitha bizneset që drejton Alajdin Fusha, i cili kërkon intervenimin e qeverisë për këtë çmim alarmant. Më parë, ky biznesmen kishte deklaruar një faturë prej 157 mijë eurosh vetëm për njërin nga bizneset e tij.

Sipas Fushës, ndonëse në tetor është kursyer rrymë krahasuar me muajin gusht, çmimi ka shkuar në 31 cent me TVSH për kilowatt, duke e cilësuar situatën si të papërballueshme për funksionimin e kompanive që merren me përpunimin e qumështit, pemëve dhe perimeve. Ai thekson se kjo gjendje ndikon drejtpërdrejt në fitimin e kompanisë dhe në pagat e punëtorëve, ndërsa kërkon vendosjen e një tavani çmimi ngjashëm me produktet e tjera.

Në anën tjetër, nga KESCO bëjnë të ditur se konsumatorët që operojnë në tregun e hapur lidhin kontrata individuale dhe se deri më tani nuk kanë pranuar shqetësime apo ankesa lidhur me këtë çështje, ndërsa ministritë përkatëse nuk kanë kthyer përgjigje.